د نړۍ نورو هېوادونو ترڅنګ افغان حکومت هم د ترکيې له منتخب حکومت خپل ملاتړ اعلان کړ او زیاته يې کړه، چې کودتا د ولسواکۍ د لارې تر ټولو ستر خنډ دی.
د افغانستان د ولسمشرۍ ماڼۍ له لوري په خپره شوې خبرپاڼه کې راغلي، چې افغانستان د کودتاوو ترخه تجربه لري او د ټاکنو له لارې په سوله ییز ډول د واک پر ليږد باور لري.
د ارګ په اعلامیه کې همداراز ویل شوي، د افغانستان دولت او ملت باور لري، چې کودتايي هڅې د دموکراسۍ، سوله، ټيکاو او پرمختګ د لارې خنډونه دي او کابل د ترکيې پر کودتا اندېښمن دی.
یاده دې وي، چې تېره ورځ د ترکیې د پوځ یوې ډلې د کودتا هڅه وکړه، خو له کودتاچیانو سره د پوځ د اکثرو غړو د نه همکارۍ او د ولس د مقاومت په نتیجه کې دغه پلان شوې کودتا ناکامه شوه.
د ترکيې ولسمشر رجب طیب اردوغان خبرداری ورکړ، چې کودتاچیانو ته به سخته سزا ورکوي.
اردوغان خپلو پلویانو ته د بېلابېلو ټولنیزو پاڼو له لارې امر کړی، چې اوس هم باید په واټونو کې و اوسي او د یو بل کودتا امکانات هم شته.
له بل لوري د ترکیې سرپرست لوی درستیز وایې پوځ په پام کې لري، چې د موازي حکومت یو شمیر غړي منفک کړي.
تر اوسه په دې اړه ۱۵۶۳ تنه پوځیان نیول کېدو سره سره د یاد هېواد د پوځ پنځه جنرالان او ۲۹ ډګروالان له خپلو دندو لرې شوي هم دي.
یاده دې وي، چې د کودتاچیانو د بریدونو او چاودونو له امله۹۰ کسان وژل شوي او شاوخوا ۱۱۰۰ نور ټپیان شوي دي.
