یوې امنيتي سرچينې، چې نه يې غوښتل نوم يې واخیستل شي، له سلام وطندار سره یې په مرکه کې وویل، چې وسله والو طالبانو نن سهار (چهارشنبه، جون ۸مه) د کندوزـ تخار له لويې لارې له ۴۵ تر ۴۷ مسافر تښتولي.
سرچينه زیاتوي، چې دغه مسافر د کندوز – خان اباد د چونزایي له سیمې له ۳۰۴ ډوله بس څخه ښکته کړی شوي او یرغمل شوي دي.
سرچينې زیاته کړې، چې د برمته شویو مسافرو په اړه کره شمېره په واک کې نشته، ښايي، چې د مسافرو شمېر له ۵۰ هم زیات شي.
له بل لوري د کندوز د ولايتي شورا رییس محمد یوسف ایوبي هم د یادې پېښې د تایید ترڅنګ سلام وطندار ته وویل، چې وسله والو طالبانو نن سهار د مسافرانو د نیولو له پاره د کندوز ـ تخار لویې لارې په اوږدو کې د لودین په سیمه کې پاټکونه جوړ کړي وو.
د ایوبي پر وینا، تر اوسه د تښتول شویو مسافرو د کره شمېرې په اړه معلومات نه لري.
خو د کورنيو چارو پخوانی امنیتي مرستیال محمد ایوب سالنګي په خپل تویټر پاڼه کې د ۲۵ کسانو د نيولو خبر ورکوي.
تر اوسه پورې د کندوز سیمه ییزو امنیتي چارواکو په دې اړه کوم ځواب نه دی ویلی.
همدارنګه د کندوز امنیه قوماندان محمد قسیم جنګل باغ هم دغه پېښه تایدوي او وايي، چې وسله والو طالبانو نن سهار شاوخوا ۸ بجې د کندوز په باغ امیر سیمه کې ځينې مسافران تښتولي دي.
ده زیاته کړه، چې تر اوسه د تښتول شویو مسافرو کره شمېره نه لري.
هغه وايي، چې د دغو مسافرو د خلاصون په موخه پوځي عملیات پېل شوي دي، چې تر اوسه ۳ تنه يې د تښتوونکو له منګولو خلاص کړي دي.
د کندوز د ولايتي شورا غړی امرالدین ولي سلام وطندار ته وویل، چې وسله والو طالبانو دغه مسافر د باغ امیر له سیمې د کوبه يي او کلم سیمو ته بیولي دي.
دغه سیمې د کندوز د څلورمې امنیتي حوزې پورې اړه لري او په سیمه کې د ډزو اوازونه هم اوريدل کېږي.
دی وايي، چې په ډېر احتمال سره دغه ډزې د تښتول شویو مسافرانو د ازادیدو په موخه وي.
یاده دې وي، چې وسله والو طالبانو په دې اړه تر اوسه څه نه دي ویلي.
