د امریکا متحده ایالاتو جګپوړي نظامي جنرال او په افغانستان کې د امریکايي ځواکونو قوماندان جنرال جان اف کمپل د دغه هېواد لوړپوړو نظامي چارواکو ته په افغانستان کې د وسله والو طالبانو د ځپلو له پاره د یرغلییزو بریدونو وړاندیز کړی دی.
د پنټاګون چارواکو ویلي دي، دغه وړاندیز جنرال کمپل د روانې میلادي میاشتې په لومړیو کې سپینې ماڼۍ ته کړی.
په ورته وخت کې د پنټاګون په غونډه کې د امریکا یو بل لوړپوړي نظامي چارواکي ویلي دي، چې د طالبانو د ځېنو مشرانو په نښه کولو کې د افغان امنیتي ځواکونو ملاتړ کوي.
دوی وايي، چې دغه وړاندیزونه په پوره غور او شننې سره شوي دي.
د امریکايي ځواکونو قوماندان جنرال کمپل د مارچ میاشتې په دویمه نېټه یې په افغانستان کې د خپلې دندې د پای ته رسېدو په ورځ د طالبانو خلاف د امریکا د هوايي بریدونو ملاتړ، د طالبانو د مشرانو خلاف د بریدونو کولو او په افغانستان کې د افغان امنیتي ځواکونو له پاره د نظامي سلا کارانو د ګومارلو وړاندیزونه وکړل.
دا په داسې حال کې ده، چې د امریکا متحده ایالاتو هوايي ځواکونو هغه وخت په طالبانو هوايي بریدونه کوي، چې امریکایان له ګواښ سره مخ وي او یا هم افغان امنیتي ځواکونه د وسله والو طالبانو له خوا د جدي ګواښ سره مخ شي.
د کمپل دغه وړاندیز په افغانستان کې د امریکا د ۲۰۱۴ کال سیاست خلاف څرګندونې دي.
د جنرال کمپل وړاندېزونه پر وسله والو طالبانو یو فشار دی او دغه چاره د سولې په خبرو کې د وسله والو طالبانو په ګډون اغیز لري.
سپینې ماڼۍ اعلان کړی، چې د جنرال کمپل وړاندیزونه تر څېړنې لاندې دي او دا به د افغان امنیتي ځواکونو سره مرسته وکړي.
سپینې ماڼۍ د روان میلادي کال په پیل کې کمپل ته په افغانستان کې د داعش وسله والې ډلې سره د مبارزې له پازه زیات واکونه ورکړي وو.
