ټاکل شوې وه، چې تېره ورځ د کابل پوهنتون د شپني پوهنځیو د وروستي سمستر لومړنۍ ازموینه واخیستل شي، د استادانو د تحصن په اساس دغه ازموینه پاتې شوه.
د دغو پوهنځیو زده کړیالان وايي، سره له دې چې خپل تحصلي لګښت په وخت ورکوي او د زیاتو ستونزو سره ټولګیو ته راځي، خو استادانو یې د معاشونو د نه ترلاسه کولو له کبله تحصن کوي.
هغه زده کړیالان چې د دولتي پوهنتونو په شپنیو پوهنځیو کې زدې کړې کوي، د خپلو زده کړو له پاره ټاکل شوې پیسې ورکوي او هغه استادان چې په شپني پوهنځي کې درس ورکوي ځانګړي معاش ورکول کیږي.
د دغو پوهنځیو زده کړیالان د لوړو زده کړو وزارت او د کابل پوهنتون ریاست د استادانو د معاشونو ورکولو د ستونزې دایمي حل په برخه کې په نه پاملرنې تورنه وي.
د کابل پوهنتون د ژورنالیزم پوهنځي زده کړیال میلاد وايي، چې استادان دې د خپلو حقونو تر لاسه کولو له پاره بله لاره ولټوي او زده کړیالان دې د دغې مسلې قرباني نه کړي.
د کابل پوهنتون ځېنې استادان وايي، چې د لوړو زده کړو وزارت له دوه کلونو راهېسې د شپنیو هنځیو استادانو معاشونه په ځند سره ورکوي او د دې ستونزې د حل له پاره منظم پلان نه لري.
د کابل پوهنتون د ادبیاتو پوهنځي استاد عبدالجمیل شېرزاد وايي، چې په شپني پوهنځي کې درس ورکوي او د روان کال له جوزا میاشتې راهیسې معاش نه دی ورکړل شوی.
نوموړې په دې باور دی، چې ځېنې مسولین په لوی لاس سره دغه کار کوي.
د ژورنالیز پوهنځي استاد جاوید سکوت وايې، چې د دوی تحصن د خپلو حقونو تر لاسه کولو پورې دوام وکړي.
په دې اړه د لوړو زده کړو وزارت د ویاند مرستیال اختر محمد عبیر د کابل پوهنټون شپني پوهنځیو د تحصن څخه بې خبري څرګندوي او وايي، چې دغه استادان د لوړو زده کړو وزارت د نوي قانون د ځېنو مادو سره ستونزې لري او په همدې خاطر یې اعتراض کړی دی.
دغو استادانو دریې اونۍ مخکې هم تحصن کړی و او د لوړو زده کړو وزارت ژمنه کړې وه، چې ستونزې به یې حل کړي.
