د پروان ولایت ځايي مسوولین وايي، د یو هلک او جلۍ مړه جسدونه یې پیداکړي دي.
د مسوولینو په وینا، پولیسو تېره شپه دغه جسدونه د چاریکارو ښار په څنډه کې د کوز خواجه سیاران په کلي کې د ګزمې په وخت پیداکړي دي.
د پروان د والي ویاندې وحیده شهکار سلام وطندار ته وویل، د پولیسو د پلټنو له مخې، هلک او جلې د میینتوب اړیکو په تور د جلۍ د ورور له خوا وژل شوي دي.
د والي ویاندې په خبره، په قتل تورن کس د پولیسو له خوا نیول شوی دی.
دوه ورځې مخکې هم د پروان ولایت په خواجه سیاران کلي او جبل السراج ولسوالۍ کې دوه مېرمنې وژل شوې وې.
