د بلخ ولایت یو شمېر اوسېدونکي وايي، فساد او بډې اخیستل د دې لامل شوي، چې د بلخ خلک په عدلي او قضايي بنسټونو بې باوره شي.
د دې ولایت ځینې استوګن وايي، ډېر ځله مجبوریږي، د خپلو ستونزو حل په برخه کې د عدلي او قضايي بنسټونو پر ځای نورو ادارو ته ورشي.
د رحمت الله په نوم د بلخ یو اوسېدونکي سلام وطندار ته وویل، په عدلي او قضايي بنسټونو کې پراخ فساد موجود دی، خلک د محکمې په پرېکړې باور نه کوي او د خپلو حقوقي قضیو حل لهپاره ولایتي شورا ته ورځي.
دغه راز د آزآده په نوم یوې مېرمنې وویل، محکمې ته له مراجعې سره سم د دروازې ساتونکي هم د خپلې لارښوونې په برخه کې پيسې غواړي.
نوموړې وايي، په عدلي او قضايي بنسټونو کې فساد دومره بنسټیز شوی، چې که هېڅ جرمي دوسیه ونه لري او د عادي کار له پار مرجعه وکړې؛ له پیسو پرته د کار خلاصول ناشوني دي.
آزآده وايي، خلک د خپلو ستونزو حل لهپاره ولایتي شورا او نورو ادارو ته ورځي.
په بلخ کې حقوقي کارپوه محمد رفیق برومن په عدلي او قضايي بنسټونو کې د فساد په اړه وايي، خلک د خپلو ستونزو د حل په موخه قومي مشرانو او ولایتي شورا ته ورځي.
دی وايي، په محکمه کې د قضیو حل زیات وخت نیسي او د موجوده فساد له کبله لګښت پرې راځي.
د بلخ ولایتي شورا مرستیال سید عبدالله مسرور د خلکو شکایتونه مني او وايي، خلک د خپلو قضیو د څېړلو او حل لهپاره دوی ته ورځي.
مسرور وویل، دوی د خلکو او عدالي او قضايي بنسټ ترمنځ د اړیکو د یو پول په څېر کار کوي.
دغه راز په بلخ کې د بشري حقونو خپلواک کمېسیون له قوانینو د خلکو ناخبري په عدلي او قضايي بنسټونو کې د فساد زیاتوالي لامل بولي.
په دې تړاو د بلخ ولایت عدلي او قضایي بنسټونه مرکې کولو ته حاضر نه شول.
