په ۶ میاشتو کې د شکرې ناروغۍ له ۳۵۰۰ زیات افغانان وژلي دي

د روغتیا وزارت چارواکي وایي، چې شکرې ناروغۍ د روان کال په ۶ لومړنیو میاشتو کې له ۳۵۰۰ زیات کسان په افغانستان کې وژلي دي.

شکرې ناروغي په وجود کې متابولیک اختلال دی.

په دې ناروغۍ اخته کس وجود، د انسولین تولید توان نه لري او یا تولید شوي انسولین نه شي کولی طبیعي عمل وکړي.

د دغه وزارت سلا کار قمرالدین صدیقي نن د (نومبر په ۱۵ مه) د شکرې (دیابت) ناروغۍ  نړیوالې ورځې نمانځنې (۱۴نومبر) په مناسبت جوړې شوې غونډه کې وویل، چې دغه معلومات د روغتیا وزارت د روغتیايي معلوماتو راټولو په دستګاه کې ثبت شوي دي، خو دغه وزارت په دیابت (شکرې) ناروغۍ اخته کسانو شمېر نه لري.

د ده په خبره، د دغو معلوماتو راټولو زیاتو مالي امکاناتو ته اړتیا لري.

صدیقي زیاتوي، چې په افغانستان کې په ۲۰۱۲ز کال کې ۹۴۹ تنه د دیابت په ناروغۍ اختیه وو.

په افغانستان کې د نړیوال روغتیايي سازمان سرپرسته ډاکټره ایمان شانکتي وايي، چې تر ۲۰۳۵ ز کال پورې له هرو ۱۲ کسانو یو تن او په ټوله کې ۶۰۰ میلیونه خلک به په نړۍ کې د شکرې په ناروغۍ اخته شي.

مېرمن شانکتي وايي، چې په هغه وخت کې به هر کال شاوخوا ۵ میلیونه تنه د دې ناروغۍ له امله ومري؛ یعنې په هر ثانیه کې یو تن.

د نوموړې په خبره، په راتلونکي کې به د دیابت ناروغۍ کلنۍ لګښت ۶۰۰ میلیاردو ډالرو ته لوړ شي او که مخنیوی یې وشي نو ۱۱ سلنه روغتیايي لګښت به وسپمول شي.

د افغانستان روغتیا وزارت سلا کار وايي، چې د اټکلي شمېرو له مخې سږ کال په نړۍ کې شاوخوا ۳۸۷ میلیونه کسان په دیابت اخته شوي دي.

دی وايي، د دیابت تشخیص له پاره درې مرکزونه په کابل او یو په هرات کې جوړ شوي دي.

دغه وزارت له افغانانو غواړي، چې د دیابت نه د ساتل کېدو په موخه دې روغتیايي خواړه وخوري؛ له ډېر خوراک نه ډډه وکړي او ورزش ته دې مخه کړي.

دوی وايي، د دې ناروغۍ د سنجش په برخه کې د روان ز کال نه تر ۲۰۲۰ز کال پورې په ټول هېواد کې د پېژندې او سنجش مرکزونو رامنځته کولو پلان لري.