په دې وروستیو کې د پکتیکا ولایت په ګومل ولسوالۍ کې د طالبانو ترمنځ اختلاف زور اخیستی او یوې نوې ډلې، طالب مشر ملااختر محمد منصور د پاکستان سړی بللی دی.
ویل شوي، چې د دغې نوې ډلې شمېر شاوخوا زرو تنو ته رسيږي.
په پکتيکا کې مدني فعال محمدالله همتيار سلام وطندار ته وویل، چې د عبيدالله د طالبانو يوه قوماندان په دې ولسوالۍ کې نوې ډله جوړه او وایي، چې ملا اخترمحمد منصور د پاکستان په اشاره وسله وال فعاليتونه کوي او په افغانستان کې د پاکستان په خوخښه جګړه کوي.
د پکتيکا د ولايتي شورا مرستيال نعمت الله بابري هم له سلام وطندار سره په خبرو کې وويل، چې د طالبانو ترمنځ اختلاف اوس په سختو وسله والو نښتو بدل شوی.
دی وایي، چې په دې وروستیو کې د ډيورنډ کرښې ته څيرمه د "ګومل" او "وړمه مۍ" د ورسک په سیمه کې د طالب ډلو ترمنځ درنه جګړه شوې ده.
د هغه په وینا، دې جګړې څلور ورځې دوام وکړ، چې دواړه ډلې د وسله والو طالبانو پورې اړه لري، چې يوه يې د ملامنصور او بله ډله يې د محمد رسول کسان دي.
د پکتيکا د والي وياند نبي الله پيرخيل هم دا خبره منې، چې په ياده ولسوالۍ کې د طالبانو د دوو وسله والو ډلو تر منځ درنه جګړه شوې، چې په پايله کې د طالب قوماندانانو په ګډون لسګونه وسله وال وژل شوي.
د هغه په وینا دواړو لورو ته ۴۵ کسان وژل شوي دي.
ومو غوښتل چې په دې اړه د وسله والو طالبانو نظر هم واخلو، خو له هڅو سره سره بريالي نه شو.
د چارو شنونکي وايي، د طالبانو پخواني مشر ملا محمدعمر د مړينې یا وژل کیدو خبر له خپریدو او د دې ډلې نوي مشر په توګه د ملااختر محمد منصور اعلان وروسته د طالبانو په لیکو کې ژور اختلافونه رامنځ ته شول چې خبره تر وسله والو نشتو هم ورسیده.
