د کندوز ولایت سیمه ییز حکومت چارواکي وايي، په دغه ولایت کې د افغان امنیتي ځواکونو او وسله والو طالبانو ترمنځ په نښته کې ۶۷۰ طالبان، ۲۲ افغان امنیتي سرتېري او ۷۰ تنه ولسي وکړي وژل شوي دي.
دغه څرګندونې نن د (اکټوبر په ۲۰مه) د کندوز ځای ناستي والي حمدالله دانشي له رسنیو سره په خبرو کې کړي دي.
نوموړي وویل، چې د کندوز ښار په دوه اونیو نښته کې ۳۵۰ وسله وال طالبان، ۱۸۰ ولسي وګړي او شاوخوا ۷۰ تنه افغان امنیتي ځواکونه ټپیان شوي دي.
دغه نښته د روان کال د ( سپټمبر په ۲۷مه/ د تلې میاشتې په ۵مه) پيل شوه، چې وسله والو طالبانو د څوو ساعتونو نښتې وروسته د کندوز ښار ونیاوه.
کندوز ښار درې ورځې د وسله والو طالبانو په لاس کې و، چې بېرته امنیتي ځواکونو لاسته ورغی او امنیتي ځواکونو له دوو اونیو وروسته ښار په بشپړډول د طالبانو له موجودیت څخه پاک کړ.
امنیتي بنسټونو د کندوز ولایت د سقوط په لومړي ماښام په یوې خبري غونډه کې وویل، چې کندوز به ډېر ژر د امنیتي ځواکونو لاسته ورشي او زیاته يې کړه، چې د کندوز د سقوط لامل او ښکېل کسان به په نښه کړي.
ولسمشر څو ځلې د کندوز له سقوط وروسته په رسنیو کې راښکاره شو او و ېې ویل، چې د کندوز پېښې د څېړلو او په نښته کې د ولسي وکړو د مرګ ژوبلې د مخنیوي له پاره یې کمېسیونونو ته دندې سپارلي دي.
غني د دغه ولایت د سقوط د څېړلو له پاره د پوهنې پخوانی وزیر فاروق وردګ او د ملي امنیت رییس امرالله صالح په مشرۍ یو کمېسیون ته هم دنده سپارلې ده.
په ورته وخت کې د کندوز ولایتي شورا رییس یوسف ایوبي سلام وطندار ته وویل، چې د دغې نښتې اوښتو زیانونو شمېر په کره ډول معلوم نه دی.
د ولایتي شورا رییس وویل، د ولایت دغه شمېرې نه تاییدولی او نه هم ردولی شي.
نوموړي وویل، د دغې نښتې د تلفاتو د معلومولو په اړه د دوی څېړنې روانې دي.
