نن د (جون په ۲۲مه) شاوخوا لس نیمې بجې د ولسي جرګې ته د تګ راتګ دروازې مخې ته یو په بل پسې ۱۰ چاودنې شوي، چې د مرګ ژوبلې په اړه یې تر اوسه کره معلومات نه دي خپاره شوي.
د ځېنو وکیلانو په خبره، چې لومړی یو ځانمرګی د پارلمان ودانۍ ته ننوتی او هلته یې ځانته چاودنه ورکړي، خو تلفات نه لري.
د عیني شاهدانو په خبره، له چاودنو وروسته د ډزې پیل شوي او نښته تر اوسه روانه ده.
د نښتې پرمهال د ولسي جرګې وکیلان له تالاره سلامت وتلي دي.
د نښتې سیمه کې د افغانستان د پارلمان تر څنګ، ګڼې موسېسې او پوهنتونه هم موجود دي.
د عیني شاهدانو په خبره، وسله وال مخالفین له یوې مخامخ ودانۍ نه ډزې کوي.
اټکل کېدلو، چې نن ولسي جرګې ته د ولسمشر د دویم مرستیال سرور دانش له خوا د ملي دفاع وزیر ورمعرفي شي.
د کورنیو چارو وزارت وايي، دوی د وسله والو د ځپلو لپاره پوره چمتوالی لري.
بل خوا ویل کېږي، چې د کورنیو چارو وزیر انورالحق علومي له امنیتي ځواکونو سره د نښتې د کابو کولو لپاره سیمې ته تللی دی.
دغه حمل نن له غرمې وړاندې پای ته ورسېدله او سیمه د امنیتي ځواکونو له خوا کابو شوې ده.
وسله والو طالبانو د پېښې مسولیت پر غاړه اخیستی دی.
