د افغانستان کرکټ بورډ اجرایوي مشر شفیق الله ستانکزي نن دوشنبه په کابل کې د الکوزي نړیوال شرکت د خرځلاو د څانګې له مشر میرویس سیال سره د لس کلونو لپاره مالي ملاتړ(سپاسرشپ) تړون لاسلیک کړ.
د کرکټ بورډ اجرایوي مشر شفیق الله ستانکزي په برابره شوې خبري غونډه کې وویل چې د تړون له مخې به هر کال دافغانستان کرکټ بورډ خزانې ته ۱ عشاریه ۳ میلیونه امریکایي ډالره ګټه رسیږي.
د ښاغلي ستانکزي په وینا چې په دې پیسو به نه یواځې افغانستان ته نړیوالې سیالۍ برابریږي؛ ترڅنګ به په کې د افغانستان کرکټ لپاره اسانتیاوې برابرول او د ځوانو کرکټرانو روزل هم شامل وي.
د نوموړي په وینا چې مالي ملاتړ کوونکي (سپانسر) د ملا تیر رول لري خو د څه باندې یو کال راهیسي دغه څانګه فلجه وه خو اوس ویاړي چی په خپلو هڅو کې بریالي شول او کرکټ بورډ ته یی پیسې راوړې.
د شفیق الله ستانکزي په وینا، چې تړون شوې پیسې به په ۳ پړاونونو کې د دوړاو ادارو د ارزونې وروسته د افغانستان کرکټ د پرمختګ لپاره په کورني کرکټ، پرمختیایي چارو او د ملي لوبډلو په سفرونو او لګښتونو کې مصرفیږي.
د کرکټ بورډ اجرایوي مشر زیاته کړه چې د الکوزي شرکت د پیسو په بدل کې به دافغانستان ملي لوبډلې په لباسونو د الکوزي شرکت (لوګو) ولګیږي، ترڅنګ به د کابل نړیوال لوبغالي دالکوزي په نوم شي او دغه راز به کورنۍ کرکټ سیالۍ ددې شرکټ په (لوګو) سره ترسره کیږي.
په همدې حال کې د الکوزي نړیوال شرکت د خرڅلاو د څانګې مشرمیرویس سیال د تړون پرمهال وویل چې الکوزی شرکت ویاړي چې افغانستان ته د ورزش له یوې بلې ویاړ ګټوونکې ادارې سره ملګري کیږي.
د ښاغلي سیال په وینا چې لوبغاړي د سولې سفیران دي او په دې ویاړي چې د هیواد د ورزش دپرمختګ دنده کې شریک دي او د کرکټ د مالي ملاتړ سره مرسته کوي.
دیادونې وړ ده چې افغانستان د څوو کلونو راپدیخوا له (اتصالات) مخابراتي شرکت څخه مالي ملاتړ (سپانسرشپ) ترلاسه کوه خو د تیر یو نیم کال راهیسي دغه تړون لغوه شوی و.
