په فراه ولایت کې نن سهار ( اپریل ۹مه) شاوخوا ۵ بجې په لسګونو طالبانو په ډله ییز ډول د ملي اردو په پوستو بریدونه وکړل.
د فراه امنیتي چارواکي وايي، له ۳۵۰ زیات طالب برید ګرو د فراه ـ فراه رود په سیمو کې د ملي اردو او پولیسو په پوستو بریدونه کړي.
په فراه ولایت کې د ملي اردو ویاند عبدالروف رحماني سلام وطندار ته وویل، چې طالب بریدګر له امنیتي ځواکونو سره په نښته شول او یاده نښته لا تر اوسه ( د راپور د چمتوکولو تر وخت) پورې روانه وه او په دې برید کې د ملي اردو یو سرتېری ټپي شوی دی.
رحماني د طالب بریدګرو د تلفاتو د کره شمېر په اړه څه ونه ویلې خو زیاته یې کړه چې د لومړنیو راپورونو پر بنسټ په دې نښته کې ۱۰ طالبان وژل شوي او ۹ تنه نور ټپیان شوي دي.
د فراه ولایت امنیه قوماندان فضل محمد صمدیار د دې خبر د پخلي ترڅنګ وویل، چې د ملي اردو، کمانډو او پولیسو مرستندویه ځواکونه د نښتې سیمې ته تللي دي او مخالفانو ته یې درنه مرګ ژوبله اړولې ده.
صمدي وايي، چې تر دې مهاله جګړه د امنیتي ځواکونو په ګټه ده.
فاریاب او جوزجان
په فاریاب او جوزجان ولایتونو کې هم تر دې دمه ۹ تنه طالب وسله وال وژل شوي دي او ۸ تنه نور یې ټپیان دي.
د جوزجان د پولیسو ویاند عبدالمنان روفي سلام وطندار ته وویل تېره شپه ( جمعه، اپریل ۸مه) په سلګونو طالبانو د شبرغان په سه شنبه تپه شهر برید وکړ چې په پایله کې یو پولیس او ۸ تنه وسله وال وژل شوي او ۵ طالبان او ۳ پولیس ټپیان شوي دي.
د روفي په وینا د امنیتي ځواکونو او طالبانو ترمنځ جګړې څو ساعته دوام درلود او د نښتې سیمې ته د مرستندویه ځواکونو په رسیدلو سره طالبانو له سیمې تېښته کړي وه.
د فاریاب ولایت د المار ولسوالۍ سرپرست ولسوال محمد صالح صالح سلام وطندار ته وویل، تېره شپه ( جمعه، اپریل ۸ مه) وسله والو مخالفینو د دیوانه خانه، بخاري قلعه، تی جم او د ولسوالۍ په مرکز باندې برید وکړ او نښته د شنبې سهار تر پنځه نیمو بجو پورې دوام درلود.
صالح زیاته کړه په دې نښته کې ملافاروق مشهور په قاري عمر او ملا رسول "خطرناک ترهګر " وژل شوي او ۶ تنه نور یې ټپیان شوي دي.
د هېواد په بېلا بېلو سیمو کې بیا په تازه ګۍ سره د طالبانو بریدونه زیات شوي دي او دمګړۍ وسله وال ځواکونه په څو جبهو کې له مخالفینو سره په نښته کې دي.
