د ملي امنیت شورا سلاکار محمد حنیف اتمر نن یکشنبه(جولای ۳۱مه) د مشرقي ولایتونو سرتاسري شورا غونډې ته وویل، چې حکومت د داعش ډلې له ريښو له منځه وړلو پلان لري او ټینګار يې وکړ، چې امنیتي ځواکونه په هیواد کې د دې ډلې ريښې له منځه وړي.
نوموړي زیاته کړه: "داعش ډلې ته د هیواد په هیڅ څنډه کې پټنځای او پوسته نه پریږدو تیره شپه د کوټ ولسوالۍ له داعش نه پاکه شوه او اوس په اچین کې عملیات روان دي پریکړه دا ده، چې د هغوی یو پتنځای او پوسته هم نه پاتې کیږي."
د ملي امنیت شورا سلاکار زیاته کړه، چې په هیواد کې د داعش د له منځه وړلو له پاره باید ولس له حکومت سره مرسته وکړي.
په ورته وخت کې د مشرقي ولایتونو سرتاسري شورا رییس عبدالخالق حسیني پشه يي غونډې ته وویل، چې حکومت مشرقي ولایتونو ته پام نه دی کړی او ددغو ولایتونو وضعیت د انديښنې وړ دی.
له دې ټولو سره سره د ملي امنیت شورا سلاکار ټینګار سره وویل، دداعش ډله هڅه کوي، چې د افغانانو ترمنځ نفاق ته لمن ووهي او له دغې ډلې سره د مبارزې په موخه باید ټول افغانان خپل یووالی وساتي او په یو اتحاد يې له پښو وغورځوي.
.jpg)
مخکې له دې هم ولسمشر محمد اشرف غني د شرقي زون وضعیت څیړنې له پاره ننګرهار ته تللی و او امنیتي چارواکو ته يې امر وکړ، چې د داعش ډلې پر ضد پوځي عملیات پراخ کړي، تر څو راتلونکو اونیو پورې د هیواد ختیځ ولایتونو کې د داعش ريښې له منځه یوسي.
