په ولسي جرګه کې د لوګر د خلکو استازي محمداکبر ستانکزي پرون ( د ۲۰۱۵ م زيږديز کال د مارچ ۱۷ مه ) ولسي جرګې په عمومي غونډه کې د خبرو پر مهال د لوګر پر امنیه قومندانۍ شوي برید کې مل پاسوال عبدالحکیم اسحاقزی په لاس لرلو تورن کړ.
د راپورونو پر بنسټ په دغه برید کې ۲۴ پولیس و وژل شول او ۹ نور ټپیان شول.
ستانکزی وايي، چې" بریدګر د امنیه قومندان د موټرو څخه په ګټې اخیستنې قومندانۍ ته د ننه شوي دي" ځکه دده په وينا د لوګر امنيه قومندانۍ ته يوازې د قومندان موټرونه کولای شي پرته له تالاشۍ ننوځي.
ستانکزی پر امنيه قومندان تور پورې کوي، چې قومندان د زياتو پېسو په اخیستلو سره پر قومندانۍ د بريد زمينه برابره کړې.
له بلې خوا د لوګر امنيه قومندان عبدالحکيم اسحاقزی بیا د ستانکزي تورونه په کلکه ردوي او وايي، چې دغه استازي په دې وروستيو کې د خپلو شخصي ګټو ته د زيان رسېدو له کبله پر ده دا تورونه لګولي دي.
اسحاقزي زياته کړه، چې "ستانکزي ډېرې ګټې په لوګر کې له لاسه ورکړي دي" له خلکو یې جزیې اخیستې او د قانون له مخې د کرومېټو د ډبرو قاچاق مخه يې هم نيول شوې.
همدا ډول اسحاقزي په ستانکزي تور پورې کړ، چې نوموړی په دې لټه کې دی، چې د امنیه قومندانۍ نوم بد کړي او په دغه قومندان داسې يو څوک مقرر کړي، چې د ولسي جرګې په راتلونکو ټاکنو کې د ده په ګټه کار وکړي.
خو په ولسي جرګه کې د لوګر د خلکو استازی بیا د قومندان تورونه په کلکه ردوي او وايي، چې دی پخپله د کرومټو د قاچاق په مخنيوي په موخه د ولسي جرګې له ادرسه د کانونو وزارت ته مکتوبونه استولي دي.
ستانکزی زیاتوي، چې افغان حکومت لا د ټاکنو په کمېسيونونو کې اصلاحات نه دی راوستي او د ټاکنو برخلیک نه دی معلوم، نو دده په وينا دا له امکانه لرې خبره ده، چې ګوندې دی به د ټاکنو په اړه کومه اندېښنه لري.
اکبر زیاته کړه، چې د لوګر په امنیه قومندانۍ کې د وژل شویو کورنۍ او خپلوان ده راغلي او وایي، چې د امنيې قومندان د دوی مدعي ده.
اکبر وایي هر ځلې چې په امنیه قومندانۍ برید شوی دی، د امنیې اوسنې قومندان په کابل کې وي او دا د، دې ښکارندويي کوي، چې دغه قومندان په دې بریدونو کې لاس لري.
د امنیې قومندان بیا وایي "زه خپل مقامات لرم، چې په دې اړه له ما پوښتنه وکړي" او دا د دې وظیفه نه ده.
د يادولو ده، چې له دې وړاندې هم دوې ځلې په یاده قومندانۍ برید شوی و، چې د لوګر د سیمه ییزو پولیسو قومندان سبزعلي هم په کې و وژل شو.
