بوگون «سهشنبه» کابلده خبری بیر ییغین اوتکزگن افغانستان بوییچه انسان حقلری ایرکین کمیسیونی مسؤوللری نینگ ایتیشیچه، 1396- ییلگه نسبتن 1397- ییلده تینچ اهالی قربانلری 19% کوپهیگن.
افغانستان بوییچه انسان حقلری ایرکین کمیسیونی باشلیغی سیما سمرنینگ ایتیشیچه، اوتگن بیر ییل جریانیده 11 مینگ و 212 تینچ اهالی هلاک ایتیلیب و یرهلنگنلر و 1396- ییلده بو رقم 9 مینگ و 413 کیشی ایدی.
خانم سمرنینگ کوپهیتیریشیچه، بو رقم قربانلیکلر جملهسیدن 3 مینگ و 32 کیشی هلاک ایتیلیب و 8 مینگ 180 کیشی یرهلنگن دیر.
افغانستان بوییچه انسان حقلری ایرکین کمیسیونی باشلیغیگه کوره، تینچ اهالی تلفاتیدن 53% طالبان گروهی، 11.9% افغانستان امنیتی کوچلری و چیتایللیک کوچلر و 12.5% داعش گروهی تامانیدن صورت تاپگن.
خانم سمرنینگ کوپهیتیریشیچه، اوتگن ییلده تینچ اهالی تلفاتیدن 21% گه سبب بولگنلر بیللی ایمس.
افغانستان بوییچه انسان حقلری ایرکین کمیسیونی مسووللری نینگ ایتیشیچه، تینچ اهالیدن 27% خودکش هجوملر، 20.25% اوروش تامانلرینینگ ییر اورویشی، 19.19% راکتی هجوملر، 16.35% جاده تپرهگیده جایلشتیریلگن ماینلرنینگ پارتلشی و 8.5% ایسه هوایی هجوملر نتیجهسیده قربان بولگنلر.
شوتوغریده…
- مارچ آییده تینچ اهالی قربانلری 3 برابر کوپهیگن
قندوز ده نظمعامه پولیسی ایکی تینچ اهالینی اولدیرگن
خانم سمرگه کوره، 847 کیشی فردی قتللر و باشقه 88 کیشی کیچه تاماندن یولگه قوییلهدیگن عملیاتلر نتیجهسیده هلاک ایتیلگنلر.
افغانستان بوییچه انسان حقلری ایرکین کمیسیونی باشلیغی گه کوره، اوتگن ییلده میدیالر و ژورنالیستلر اوستیگه صورت تاپگن هجوملرده 24 کیشی هلاک، 20 کیشی یرهلنیب و باشقه 27 ژورنالیست کلتکلنگنلر.
افغانستان بوییچه انسان حقلری ایرکین کمیسیونی مسووللری، دولتدن بوتون امنیتی کوچلرگه خلق ارا انسان دوستلیک قانونینی تعلیم بیریشی و تینچ اهالی تلفاتیگه توسیق بولیش اوچون غفلت قیلگن مسووللرنینگ جزالنتیریشینی سورهگنلر.
اوشبو کمیسیون مسووللری، اوروش تامانلریدن تینچ اهالی تلفاتیگه توسیق بولیش اوچون آتیشکیسین اعلان قیلیشینی سورهگنلر.
