دغه دوه قومونه کامدېشو او کشتوزو نومېږي، چې ۹۰ کاله پخوا یې ترمنځ د اوبو د یوې ویالې پر سر جنجال راپورته شوی و.
تر دامهاله د دغو دوو قومونو په شخړو کې شاوخوا ۴ سوه تنه مړه شوي او ۲۵۰ ټپیان شوي دي.
د ولسمشر غني له خوا د دغو دوو قومونو د روغې جوړې لپاره یوه لس کسیزه جرګه جوړه کړې ده.
د سه شنبې د (می په ۵مه) د نورستان ولایت کې د دې جرګې کارونه د ځای ناستي والي حافظ عبدالقیوم د نورستان اړوند دولتي چارواکیو او د دواړو قومونو استازو په حضور کې د غرمې نه وروسته رسمآ پرانستل شول.
ځای ناستي والي وویل، په نورستان کې د ناامنیو او بدبختیو لوی عامل قومي تربګنۍ دي، چې د کامدېشو او کشتوزو قومونو تر منځ تربګني یې غوره بېلګې دي.
د ده په خبره، له دغو ډول تربګنیو او دښمنیو نه وسله والو مخالفینو نه هم ګټه اخیستې ده.
د جرګې مشر اسد الله وفا وویل، د نورستان ستونزه د ټول افغانستان ستونزه ګڼي او ښکیلو اړخونو ته ډاډ ورکوي، چې په عدالت او بې پریتوب سره به حل لاره لټوي، چې دواړو قومونو ته د قناعت وړ پرېکړه وکړي.
که څه هم د نورستان د نورو قومي تربګنیو تر څنګ د کامدېشو او کشتوزو د تربګنیو د حل په موخه یو ځل د امیر امان الله خان په دوران کې دولتي پرېکړه شوې، خو تربګنۍ پای ته ونه رسېدلې.
د افغان ولسمشر اشرف غني له خوا داسې یوه جرګه ټاکل کېږي، چې باصلاحیته هم دی او ډېری خلک هیله لري، چې د چارواکیو په وینا ډېر ژر به نېږدې ورځو کې په کار پیل وکړي.
