نی یا د ازادو رسنیو د ملاتړ ادارې مسوولین د خپل یو کلني راپور د خپرولو پر مهال وویل، چې تېر ۲۰۱۵ م ز کال د رسنيو او خبریالانو له پاره په افغانستان کې تر ټولو بد کال وو.
دغه اداره وايي، چې په ۲۰۱۵م ز کال کې ۲۴ رسنۍ په جدي ډول ګواښل شوي دي.
د "نی" ادارې رییس صديق الله توحيدي وايي، چې په ۲۰۱۵م ز کال کي ۹۵ له تاوتریخوالو ډکې پېښې ثبت شوې دي، چې د دغو پېښو زیاته برخه يې د طالبانو له لوري ترسره شوي دي.
هغه زیاتوي، چې ۳۲ نورې د تاوتریخوالو ډکې پېښې بیا د حکومتي مقاماتو له لوري ترسره شوې دي، چې ۲۲ هغه يې ناشناس چارواکي دي، چې رسنۍ يې ګواښلي دي.
توحيدي زیاتوي، چې د روان کال په جریان کې ۴ خبریالان وژل شوي، ۳ ټپيان ، ۴ تنه زنداني، ۲۰ تنه وهل شوي او ۶۴ نور يې بیا له ګواښونو او بدو خبرو سره مخ شوي دي.
همدارنګه هغه په ۲۰۱۵م ز کال کې معلوماتو ته نه لاسرسی د خبریالانو یو له جدي ستونزو یاد کړ.
له بل لوري د دغې ادارې له خوا د سیاسي چارو کارپوه احمد سعيدي ته د شجاعت تندیس هم ورکړل شو.
هغه یو وار بیا پر حکومت تور پورې کړ، چې د ده د ترور په دوسیه کې د اړوندو چارواکو له خوا ناغيړي کيږي.
له دې سره سره د نی دفتر وايي، چې له تېرو څو کلونو راهیسې د ۱۶ وژل شويو خبریالانو دوسیو ته پاملرنه نه ده شوې او دوی له دولت څخه غواړي، چې دغو دوسیو ته باید جدي پاملرنه وکړي.
