جاری ییل 4- اسد 7.7 ریشترلیک ییر قلتیرهشی افغانستان، پاکستان، هندوستان و تاجیکستاننی ایریم منطقهلرینی تیترهتگنیدن کیین، باشقه نیچه ییر قلتیرهش کابلنی تیترهتدی. ایکی هفته تینچلیکدن کیین، اوتگن کیچه یوزبیرگن کوچلی ییر قلتیرهشگه قرهگنده، ییر حاضرگچه تینچ تورمهگن. بیراق کورینیشیچه، کیینمه کیین ییر قلتیرهش خودکش و پارتلش هجوملرگه قرهگنده پایتخت یشاوچیلرینینگ کوپراق خواطرگه سالگن.
شو کیچه و کونده پایتخت یشاوچیلرینینگ فکری و تیلیگه یالغیز ییر قلتیرهش سوزی ایلَنهدی. خیابانلر و کوچهلرده برچه ییر قلتیرهشیدن گپیرهدی؛ دیمک قندهی بیرشکلده بیرینچی قلتیرهشده اوزلرینی اویدن چیقارگن؛ عین حالده، فرزندلری ییر قلتیرهشیدن قورقیب و ییغلر ایکن. کورینیشیچه، سونگی ایکی و اوچ آیده خودکش و پارتلش مسئلهلری کابل یشاوچیلرینینگ فکریدن اوتکزیلگن. خودکش هجوم خواطری جایینی ییر قلتیرهشیگه بیرگن. خلقنینگ ایتیشیچه، باشقه آیاقلرینی آستیگه هم ایشانمهیدی و هر پیت ییر یاریلیب و اولرنی ایچیگه تارتیشی احتمالدن اوزاق ایمس.
کابلده یوزبیرگن سونگی ییر قلتیرهشلر باشقه واقعهلر بیلن هم بیرگه بولگن. 4- اسد ده یوزبیرگن ییر قلتیرهشده کابل شهرینینگ ایریم قسمتلری اوزگریب و شهر کورینیشی غربی مملکتلردیک بولگن. مثلا آریا شهرچهسیده حجابسیز عیاللر و قیزلر قورقیشلریدن هر تامانگه قاچیب، ییر قلتیرهشیدن قورقگنی باعث، باش پناه آخترگن.
بیراق اوشه کون، شهرنی باشقه قسمتلریده باشقچه واقعه یوزبیرگن. ییر قلتیرهشیده یالغیز ایرککلر اویدن چیقگن. هیچ بیر حجابلی عیال هم قاچگنلر ایچیده کورینمهگن؛ کورینیشیچه کیمسهنینگ اوییده عیال بولمسه و بولگن صورتده هم قاچیشگه جانی قالمهگن بولسه کیرهک.
ییر قلتیرهشیدن کیین، هر بیر کیشی واقعه توغریسیده باشقچه اویلر ایدی. بیر کیشی تینگری اچیغی و بشر مصیبتگه نسبت بیرهدی؛ باشقه بیر کیشی بدخشاندهگی ولقانلر اویغانیشی دیب؛ ینه بیر کیشی کابل توپراغی بوشلیگیدیب فکر بیلدیرگن.
عیاللر اوچون بولگن ایچکی کییم و آرایش لوازملرینی ساتهدیگن کابل شهری دکاندارلریدن بیری علی آریننینگ ایتیشیچه، بوندهی ییر قلتیرهشلر الله اچیغی و جامعهده دوام ایتیب کیلهیاتگن اخلاقی فسادلرنی کورستهدی. آرین عطرلریگه اشاره قیلیب ایتیشیچه، عیاللر بو عطرلردن فایدهلنیب ایرککلرنی اوزیگه جلب ایتهدی و بو ایش ارا اجتماعده اخلاقی فساد رواجلنهدی.
ییر قلتیرهش وحمیهسی بیرقطار کیشیلر اوچون توشگه اوزگرگن. کابل یشاوچیلریدن بیری رفیع احمدینینگ ایتیشیچه، سونگی ییر قلتیرهش جریانیده، قتیق قورقگنی باعث، روحی کسللیککه چالینگن و هر پیت آیاق آستی قلتیرهشینی حِس ایتهدی.
کیینمه کیین ییر قلتیرهشلر، پایتختدهگی معیارسیز بنالر قیینچیلیگی قیتهدن خبرلر باش خطی بولدی. کابل یشاوچیلرینینگ ایتیشیچه، ییر قلتیرهشی و قتیقلیگیدن قورقمهیدی، بلکیم سونگی نیچه ییلده قوریلگن معیارسیز بنالردن قورقهدی.
