سلاموطندارگه صحبت بیرگن غور ولایتی کینگشی اعضاسی و فاریاب محلی مسؤوللرینینگ ایتیشیچه، غور ولایتینینگ پسابند و فاریاب ولایتینی پشتونکوت تومنلرینینگ اهالیسی حکومت بیلن همکارلیک قیلگنی باعث، طالبان گروهی نیچه وقتدن بیری مذکور تومنلرنینگ قتناو یوللرینی باغلهگن.
اولرگه کوره، مذکور گروهنینگ جنگریلری کیمسه گه ییگولیک آذیق-آوقت و باشقه نرسهلرنی انتقال بیریش گه رخصت بیرمهیدی.
غور ولایتی کینگش اعضاسی عبدالبصیر قادرینینگ ایتیشیچه، پسابند تومنی 8 آیدن بویان طالبلرنینگ اقتصادی تحریمی گه دوچ کیلگن و حاضر مذکور تومننینگ بازاریده هیچقندهی ییگولیک آذیق-آوقت تاپیلمهیدی.
قادری گه کوره، قیینلیک بیلن تاپیلهدیگن بیر لیتر تیل بهاسی حاضر 130 افغانی گه ییتیشگن.
شونینگدیک، غور حاکمی سوزلاوچیسی عبدالحی خطیبی، پسابند تومنی طالبلرنینگ جدی اقتصادی تحریمی گه دوچ کیلگنینی تن آلهدی و اولر محل بویوکلری و رواجلنتیریش کینگشلر همکارلیگیده بو قیینچیلیکنی حل قیلیش اوچون سعی و حرکت قیلهدیلر.
شو توغریده…
فاریاب؛ طالبان آذیق-آوقت نی تحریم قیلگن
عین حالده، فاریاب ولایتینینگ محلی مسؤوللری، پشتونکوت تومنینینگ ایریم منطقهلری طالبان گروهی تامانیدن اقتصادی تحریم قیلینگنیدن خبر بیرهدی. اولرنینگ ایتیشیچه، مذکور تومننینگ سرحوض منطقهسی بیر آیدن بویان طالبلر تامانیدن اقتصادی قمراوگه آلینگن.
سلاموطندارگه صحبت بیرگن پشتونکوت تومنی سرحوض منطقهسیده مردمی کوچلر قومندانلریدن بیری ولی محمدنینگ ایتیشیچه، اوشبو تحریملر نتیجهسیده حاضرگچه 3 باله و 2 عیال جان بیرگن.
فاریاب محلی مسؤوللری و غور ولایتی کینگش اعضالری، مرکزی حکومتدن مذکور تومنلرگه امکانات ییتکزیشی و طالبلرنینگ اقتصادی تحریملرینی سیندیریش اوچون تیزلیککه چاره تدبیر کوریشینی سورهگن.
