سلاموطندار تامانیدن قولگه کیریتیلگن حجتگه کوره، «افغانستان اجتماعی یاشلر و عالی مؤسسه» ناملی قندوز ولایتینینگ نادولت ادارهلریدن بیری بنگی عیاللرنی دارولش بهانه بیلن بیر کلینیک ایجاد قیلگن و اونده تحصیل کورگن داکتر و تجربهلی ایشچیلردن خبر یوق و بو کلینیکنینگ برچه ایشی یالغیز بیر عایلهنینگ اختیاریده بولگن.
قندوز ولایتی ساغلیقنی سقلش ریاستی تیکشیریش و نظارت قیلیش مدیریتینینگ مکتوبیده کیلیشیچه، 20 یاتاقلیک کلینیکنینگ ایشچیلریدن هیچ بیرینینگ تحصیلی یوقاری ایمس و مذکور کلینیک مسؤوللری و ساغلیقنی سقلش ریاستی اورتهسیدهگی کیلیشوو اساسیده، کلینیک باشلیغی داکتر بولیشی کیرهک، بیراق قابلهلیک بولیمیگه درس اوقیگن. شونینگدیک، کلینیک باشلیغینینگ آنهسی مالاریا تکنالوژیستی بولیب، پرستارلیک قیلهدی.
آنه و قیزیدن تشقری کلینیک باشلیغینینگ ابهسینینگ اوغلی و خالهسی او ییرده ایشلهیدی و کوپینچهسی کلینیکنی مالی و اداری بولیملریده تعیین ایتیلگن.
سلاموطندارگه ییتیشگن حجتگه کوره، اوشبو 20 یاتاقلیک کلینیکده اوتگن ییل قوس آییدن فعالیتگه باشلب حاضرگچه هیچ بیر کسلنی دارولمهگن و رویخطگه آلیش کتابیده یالغیز نیچه کیشیگه مصلحت بیریلیب رویخطگه آلینگن.
قندوز ولایتی ساغلیقنی سقلش ریاستی منبعلریدن بیری آتی فاش ایتیلیشینی ایستمهی سلاموطندارگه ایتیشیچه، «افغانستان اجتماعی یاشلر و عالی مؤسسهسی» ییلده کلینیک خرجتی اوچون مخدره مادهگه قرشی کورهشیش و بیرلشگن ملتلر تشکیلاتی جرملر دفتریدن 2 میلیون افغانیدن آرتیق پول قولگه کیریتهدی.
شونینگدیک اوشبو کیلیشووده، 20 یاتاقلیک کلینیک قلعۀزال تومنیده قوریلیشی ایتیلگن، بیراق مذکور کلینیک حاضر قندوز شهرینینگ بیر چیککهسیده قوریلگن. قندوز ولایتی کینگش اعضاسی اسدالله ساداتنینگ ایتیشیچه، قلعۀزال تومنی خلقینینگ حقیگه جفا بولگن و ساغلیقنی سقلش ریاستی بو توغریده جواب بیریشی لازم.
بیراق، مذکور ولایت ساغلیقنی سقلش ریاستی باشلیغی سعد مختارنینگ، بنگی عیاللر کیلینیکیده کینگ فساد موجودلیگی توغریسیده ایتیشیچه، ساغلیقنی سقلش ریاستی، اوشبو کلینیک ایشچیلرینی تعیین ایتمهگن و فعالیتلرینی هم تیکشیرمهگن. شونینگدیک جناب مختارنینگ کلینیک موقعیتی اوزگریشی توغریسیده ایتیشیچه، ناتینچ لیکلر و توقنهشوولر خطری باعث، ساغلیقنی سقلش وزیرلیگی بیلن ریجهنی عملگه آشیرووچی اداره اورتهسیده قول قوییلگن باشقه بیر کیلیشوو اساسیده، کیلینیک موقعیتی اوزگرگن.
اوشبو کلینیک مسؤولی ناز بیبینینگ سلاموطندارگه ایتیشیچه، «مینی کیملیگیم و نیمه ایش قیلیشیم هیچ کیمگه تیگیشلی بولمهیدی. سیزلر مینی بدنام قیلیش اوچون داکترلردن پاره آلگن سیزلر»
سلاموطندار تامانیدن قولگه کیریلتگن حجتنی کورسهتیشیچه، مخدره مادهگه چالینگنلرنینگ دارولهیدیگن 50 یاتاقلیک شفاخانه، «1.11.1394» تاریخیده بیر مکتوب آرقهلی مخدره مادهگه چالینگن عیاللرنی دارولهیدیگن 20 یاتاقلیک کلینیک آمریتیدن تیزلیکده فعالیتلرینی توختهتیشینی سورهگن. بیراق صادر ایتیلگن فرماندن 4 آی اوتیب، اوشبو کلینیک حاضرگه قدر فعال تورگن، دیمک قندوز ولایت مقامی هم اوشبو چیگللیکدن خبردار بولیب و حاضرگهقدر اونگه قرشی هیچ بیر ایش قیلمهگن.
