افغانستان جمهور رییسی محمد اشرف غنی پنجشنبه کونی (22- حمل) فاریاب ولایتی مرکزی میمنه شهریگه سفر قیلیب، فاریاب اهالیسی نمایندهلری، دولت رسمیلری همده سۉنگی هفتهلر ایچیده سوو تاشقینلریدن زیان کۉرگن اهالی بیلن اوچرهشدی. عین حالده او قوریلیش ایشی اۉز نهایهسیگه یېتگن میمنه شهری نسایی- ولادی شفاخانهسی بناسی نینگ آچیلیش مراسمیده قتنهشدی. شونینگدېک کون دوامیده بیر قطار پروژهلر جملهدن میمنه شهری نینگ ایچیملیک سوو ترماغی، پروفیسور غلام محمد میمنگی نامیدهگی ییریک مدنیت مرکزی و ابو حنیفه جامع مسجدی نینگ تَمَل تاشلرینی قۉیدی.
محمد اشرف غنی فاریاب اهالیسی نمایندهلری بیلن اوچرهشگنیده مذکور ولایت خلقیگه بیر قطار وعدهلرنی بېردی. فاریاب ولایت مقامینی بیرینچی درجهلی ولایتلر قطاریگه یوکسلتیریش، فاریاب ولایت تشکیلیگه ایکینچی اۉرینباسرلیکنی کۉپهیتیریش، تورکمنستان دولتی راضیلیک بیلدیرگن حالده خواجه قچهی (خواجه قَچَی) بندرگاهینی آچیش، فاریابلیک کادرلردن ولسی جرگه نینگ سابق عضوی محمد هاشم اۉرتاقنی ایچکی ایشلر وزیرلیگی نینگ مخدر مادهلرگه قرشی کۉرهش بۉییچه معینی اېتیب تعیینلش، المار و دره آغزی (دهندره) سوو توغانلری قوریلیش ایشینی تېزلشتیریش، مکتبلر اوچون اۉزبېک تیلی درسلیکلرینی چاپ اېتیش، فاریاب بیلیم یورتیده تکنالوژی فاکولتهسینی آچیش، قطار اۉزبېکلرنی ماسترلیک اوچون قوشنی اۉزبېکستانگه جۉنهتیش، اندخوی تومنیده ایچیملیک سوو لایحهسینی عملگه آشیریش جمهور رییس نینگ فاریابلیکلرگه بېرگن وعدهلری جملهسیدن دیر.
فاریاب شمال نینگ اېنگ ناتینچ ولایتی سنهلهدی. اۉتگن بیر ییل ایچیده اوشبو ولایت نینگ اطراف حدودلری جنگری طالبلر اشغالیگه اۉتدی. فقط میمنه شهری همده فاریاب ولایتیگه قرهشلی تومنلر مرکزلری دولت نظارتیده.
اوزلوکسیز جنگلر دوامیده یوزلب عایلهلر اۉز تورر بنالرینی ترک اېتیب، شبرغان، مزارشریف و میمنه شهرلریگه قاچیب باریب جایلشگنلر. حاضرگی کونده فاریاب ولایتی مرکزی ایچکی مهاجرلر قرارگاهیگه ایلنگن. اولر اۉته آغیر احوالده حیات کېچیرهدیلر. ولایت مرکزینی شبرغان شهریگه باغلهیدیگن کته ترانسپورت قتناو یۉلی نینگ کته قسمی طالبلر نظارتیده قالماقده.
جمهور رییس غنی نینگ فاریاب خلقیگه بېرگن وعدهلری، بو ولایت اهالیسی نینگ اېنگ اساسی احتیاجلریدن حسابلنهدی. بیراق، بو وعدهلر قچان و قندهی عملگه آشیشی اۉز اۉزیدن سواللر توغدیرهدی. عمومی سواللردن بیری شو بۉلیشی ممکن که جمهور رییس نینگ صلاحیت مدتی اۉز یکونیگه یېتماقده. جناب غنی بو وعدهلرنی قهی زمان عملگه آشیرهدی؟
جمهور رییس فاریابلیکلرگه بیرگن بیر قطار وعدهلرینی بیر ایکی آی ایچیده عملگه آشیریشی ممکن. جملهدن فاریاب امنیتی نی قیته تیکلش اوچون تأثیرچن حربی عملیاتلرنی یۉلگه قۉییش، فاریابلیک کادرلرنی حکومت ادارهلریده مناسب ایش بیلن تأمینلش، فاریاب بیلیم یورتیده ینگی فاکولته و بۉلیملر آچیش، اۉزبېک تیلی درسلیکلرینی چاپ قیلیش و محتاج اهالی اینیقسه ایچکی مهاجر عایلهلرگه انسان پرورانه یاردملر یېتکزیش کبی وعدهلرنی قیسقه وقت ایچیده جمهور رییس تامانیدن عملی اېتیلیشی گه ایشانسه بۉلهدی البته. اما، بیر قطار وعدهلر جملهدن المار و دره آغزی سوو توغانلرینی قوریش کبی لایحهلرنی قیسقه مدت ایچیده عملگه آشیریلیشی قیین.
جمهور رییس نینگ سیلاولر بۉییچه رقیبلری محمد اشرف غنی نینگ ولایت سفرلری همده اوشبو سفرلر جریانیده خلققه بېرگن وعدهلرینی سیلاولرگه قرهتیلگن سۉزلر دېب ادعا قیلماقدهلر. بیراق، جناب غنی گه یقین رسمی منبعلر اوشبو دعوالرنی رد قیلیب، جمهور رییس نی دولت و حکومت ایشلرینی عملگه آشیریش اوچون ولایتلرگه باریشگه حقلی دېیدیلر.
افغانستان رهبری نینگ مملکت ولایتلریگه سفر قیلیشی هیچ بیر شرایطده قانونده چېکلنمهگن. او، ایستهگن پیتی افغانستان نینگ هر بیر نقطه سیگه باریش و اهالی بیلن اوچره شیش حقیگه اېگه. عین حالده اونینگ اوز سفرلری چاغیده خلققه بېرگن وعدهلرینی سیلاولرگه قرهتیلگن بۉلیشی حقیقتینی قندهی اثباتلش ممکن؟
افغانستان رهبری هر بیر زمانده مملکت نینگ هر بیر منطقه سیده لایحهلرنی آچیش و اهالیگه وعده بېریشگه هم حقلی.
محمد اشرف غنی نینگ کېینگی کونلرده خلققه بېرهدیگن وعدهلرینی عملگه آشیریلیشی مهم دیر. اوشبو وعدهلرنی عملگه آشیریش اوچون دولت نینگ تېگیشلی ادارهلری عملی قدملر تشلهگنده، افغانستان رهبری نینگ اوشبو وعدهلرینی سیلاولرگه قرهتیلگنی تۉغریسیدهگی ادعالرنی هیچ و پوچلیگی اۉز اۉزیدن اثباتلنهدی. اگر بېریلگن وعدهلرنی عملگه آشیریش بارهسیده بی فرق یاندهشیلگن تقدیرده، اهالی جمهور رییس نینگ وعدهلری سیلاولرگه قرهتیلگنی گه شک قیلیشی ممکن.
فاریاب اهالیسی جناب غنی نینگ اولرگه بېرگن وعدهلرینی تېز آرهده عملگه آشیریلیشینی کوتهدیلر. مذکور وعدهلرنی علمده تطبیق اېتیش اوچون فاریاب ولایتی مسووللری همده اوشبو ولایت نینگ پارلماندهگی نمایندهلری جمهور رییس نینگ فاریابلیکلرگه بېرگن وعدهلری عملگه آشیریلیشی اوچون تېگیشلی ادارهلر آرقهلی تعقیب ایتیشلری گه هم احتیاج بار.
