فاریاب ولایتی محلی خوف‌سیزلیک بلند مرتبه‌لی رسمیلری ولایت‌نینگ گرزیوان ولسوال‌لیگی 24 ساعت‌دن کیین دولت قولیگه اوتگنی باره‌سیده خبر بیرگنلر.
جنگری طالبلر اوتگن هفته چهارشنبه کونی مذکور ولسوال‌لیک‌نینگ ایریم قیشلاقلرینی اشغال ایتگندن سونگ اوشبو تومن‌نینگ ولسوال‌لیک بناسی همده امنیه قوماندانلیکنی اوز تصرفیگه آلگن ایدی.
گرزیوان تومنی نینگ ولسوالی مذکور ولسوال‌لیک‌نینک کوپ وقتدن بیری امنیه قوماندانی تعین ایتیلمه‌گن بیر چاغده دولت قورال‌لی مخالف‌لری‌نینگ نظارتیگه اوتگن دیگن. ایتیلیشیچه، ولسوال‌لیک نینگ 60 پولیس عسکریدن 45ته‌سی اوز وظیفه‌سینی ترک قیلگن.
فاریاب پولیس قوماندانلیگی‌نینگ امنیت آمری بریالی بشریارنینگ سلام‌وطندارگه ایتیشیچه، گرزیوان ولسوال‌لیگی‌نینگ بناسی اهالی یاردمی بیلن قیته‌دن ملی کوچلر تصرفیگه اوتگن.
عین حالده، ولایت سرپرستی عبدالستار بارزنینگ سوزلریگه کوره، ملی اردونینگ یوزلب حربی‌سی گرزیوان ولسوال‌لیگی‌گه سفر بر بولیب، اوشبو تومن‌نینگ برچه قیشلاقلرینی جنگری طالبلر تصرفیدن تازه‌لیدیلر.
کیکاوس، قزاق، فریش، شش‌قره، غال‌نمک، دره‌جوز، گاوکی، تگابشان و جر قلعه قیشلاقلری اوتگن هفته قورال‌لی طالبلر آرقه‌لی تصرف ایتیلگن ایدی و هنوز هم یوقاریده ایسه‌تیلگن قیشلاقلر جنگریلر تامانیدن باشقریله‌دی.
عین حالده، ایریم گزارشلرده ولایت مرکزی میمنه شهری هم قورال‌لی طالبلر تامانیدن جدی تهدید آستی‌گه آلینگنی قید ایتیلگن. فاریاب ولایت سرپرستی عبدالستار بارزنینگ بیلدیریشیچه، ولایت مرکزی میمنه شهری‌نینگ وضعیتی تشویشلی ایمس. اونگه کوره، ولایت‌نینگ خوف‌سیزلیک بیلباغ‌لریده ییرتلی درجه‌ده ملی کوچلر ییرلشتیریلگن و باشقه حربی کوچلر هم میمنه مرکزیگه کیلیشی کوتیله‌دی.
فاریاب‌ده شاهین 209- قول ارود بیرینچی لواسی‌نینگ سوزلاووچی‌سی رضا رضایی‌نینگ اوتگن کون (جمعه) سلام‌وطندارگه بیلدیریشیچه، ملی اردو همده عامه انتظام لاووچی پولیس کوچلری میمنه شهری اطرافی‌ده مستحکم خوف‌سیزلیک بیلباغ‌لر تشکیل ایتگنلر.
جناب رضایی، ملی اردونینگ ییریک قطعه‌سی، کماندو کوچلری قوشیمچه افغانستان جمهور رییسی‌نینگ بیرینچی اورین باسری جنرال عبدالرشید دوستم تیزلیک‌ده میمنه شهریگه کیلیشی‌نی تیل‌گه آلگن. رضایی، مذکور حربی قوشین‌لر میمنه‌گه کیلیشی بیلن جنگری طالب‌لرنی نابود قیلیش اوچون ییریک حربی عملیات اوتکزیلیشی انابت‌گه آلینگن دیگن.
