24- جوزا، «چهارشنبه» کون افغانستانده آنهلر کونی صفتیده نشانلنهدی؛ بوکون اوروش دورانیدن میراث قالگن یتیم فرزندلرینی کته قیلگن آنهلرنینگ کونی؛ فرزندلرینی کته قیلیش اوچون هم آته و هم آنه صفتیده رول اوینهگن آنهنینگ کونی؛ بو اولکهنینگ زحمت چیکیب و درد کورگن آنهلرینینگ خلق ارا کونی و فرزندلرینینگ حیاتیده اساسی رول اوینهگن مهربان آنه جانلرنینگ کونی حسابلنهدی.
افغانستاننینگ سنتی جامعهسی و ایرکک سالارلیک فضاسیده عیاللرگه اونچهلیک رول بیریلمهیدی. جامعهدهگی رسم و رواجلر سبب عیاللر دستلبکی حقلریدن هم محروم قالگن.
عیاللردن بیرقطارینینگ ایتیشیچه، افغانی غیرت باعث ایرککلردن بیرقطاری، عیاللرنی اوز آتلریگه چقیرمهیدیلر و تورموش اورتاقلرینی ییریک فرزندلرینینگ آتیگه چقیرهدی.
عین حالده، بیلیم یورت استادلری و یازووچیلردن بیرقطارینینگ ایتیشیچه، افغانستاننینگ اداری رسمیتیده آنهنینگ آتی کورینمهیدی؛ برچه ادارهلرده آتهنینگ آتی رویخطگه آلینهدی و هیچ بیر اداره ده آنهنینگ آتی رویخطگه آلینمهیدی.
کابل یشاوچیلریدن بیرقطارینینگ ایتیشیچه، افغانستان ایرککلریدن کوپینچهسی اهالی حضوریده تورموش اورتاقلرینینگ آتینی آلیشدن باش تارتیب و بو مسئلهنی اویت دیب بیلهدیلر.
اولرگه کوره، ایرککلر کوپینچه پیتلرده تورموش اورتاقلرینی ییریک فرزندلرینینگ آتیگه چقیرهدیلر.
بیلیم یورت استادی خدیجه مرادینینگ ایتیشیچه، افغانستاندهگی آنهلر، باشقه مملکتلرنینگ آنهلریدن کوره کوپراق فرزندلرینی تربیهلشده رنج کورهدیلر و آتهلرنینگ یانیده توریب فرزندلرینی کته قیلیشده اساسی رول اوینهیدیلر، بیراق افغانستاننینگ اداری رسمیتیده اولرنینگ آتی آلینمهیدی.
خانم مرادیگه کوره، بیر کیشی بیران ادارهگه مراجعت قیلگن صورتده، برچه فورملرده آتهسینینگ آتی رویخطگه آلینهدی و فرزندنینگ تربیهلنیشی و کته بولیشیگه اساسی رول اوینهگن آنهنینگ آتی رویخطگه آلینمهیدی.
خانم مرادینینگ کوپهیتیریشیچه، بیرینچی مرته سیوی سیده آنهسینینگ آتینی یازگن و بو موضوع باشقهلرنی حیرتگه توشیرگن.
اوشبو بیلیم یورت استادینینگ ایتیشیچه، سیناو جریانیده شاگردلریدن سیناو ورقیده آنهلرینینگ آتی یازیلیشینی سورهگن، بیراق شاگردلریدن بیرقطاری حیرتلنگن و بیرقطاری ایسه آنهلرینینگ آتینی بیلمس ایکن.
خانم مرادی، عیاللرنینگ حقوقی خصوصیده فعالیت قیلهدیگن ادارهلر و قوریلمهلردن افغانستان ادارهلرینینگ رسمیتیده آنهلرنینگ آتی رواجلنیشی توغریسیده سعی و حرکت قیلیشلرینی طلب قیلهدی.
عین حالده، یازووچی عبدالرحیم احمد پروانینینگ ایتیشیچه، اداری رسمیتده آنهنینگ آتیگه اورین یوق دیر.
جناب پروانیگه کوره، مملکتده حاکم رسمو رواجلر و عیاللرنینگ توغریسیده دینی تعلیماتلردن ناتوغری فایدهلنیش باعث عیاللر جامعهده ایرکین شکلده کورینمهیدی.
عیاللرنینگ حقوقیدن مدافعه قیلووچی ادارهلرنینگ ایتیشیچه، بو توغریده مدنیت رواجلنیب و دولت تامانیدن لایحه ایجاد ایتیلیشی کیرهک.
اولر، دولتدن برقی کیملیک حجتلرده آنهلرنینگ آتی هم رویخطگه آلینیشینی سورهیدیلر.
