د لوګر، پکتیا، پکتیکا او خوست ولایتونو د کوچیانو لسګونو قومي مشرانو د یوې غونډې په ترڅ کې خپلې ګڼې ستونزې د لوګر ولایتي ادارې له چارواکیو او له هغې لارې له مرکزي حکومت سره شریکې کړې.
د را ټولو شویو کوچیانو په استازولۍ حاجي سلام خان کوچي وویل، چې په تېرو څوو کلونو کې د افغانستان مرکزي حکومت او د لوګر ولایتي ادارې له پامه غورځولي دي.
هغه همدا راز وویل، چې اوسمهال کوچیان په لوګر کې پر پوهنې، رغنیزو پروژو او مالدارۍ سربېره د سرپنا د ځمکو له ستونزې سره مخ دي.
ده زیاته کړه، کله چې ولایتي ادارو ته ځي؛ د دې پر ځای چې د هغو ستونزه واوري، بېعزته کېږي. دوی له حکومته غوښتنه وکړه، چې ژر تر ژره د کوچیانو ستونزې هوارې کړي.
کوچیانو مرکزي حکومت ته وړاندیز وکړ، چې پر لوګر سربېره د پکتیا، پکتیکا او خوست ولایتونو کوچیانو ته ځانکړې پاملرنه وکړي. دوی په ټینګار سره وویل، چې د پوهنې په برخه کې له جدي ستونزو سره مخ دي.
جوړې شوې غونډې ته د لوګر والي محمد حلیم فدايي د کوچیانو ستونزې پر ځای وبللې او زیاته یې کړه، چې ډېر ژر به د کوچیانو د ستونزو په حل کې نه یوازې د لوګر ولایتي اداره، بلکې مرکزي حکومت هم ګامونه واخلي.
ده زیاته کړه، د کوچیانو د حقوقو په تړاو د پخواني ولسمشر حامد کرزي فرمان به دقیقاً عملي کېږي او د هغوی ټولي ستونزې به هوارېږي.
فدايي که څه هم د چا نوم وانهخیست؛ خو زیاته یې کړه، چې یو شمېر کړۍ هڅه کوي چې د لوګري کوچیانو ترمنځ واټن پیدا کړي؛ خو دولت به دې کړیو ته د توطیه جوړولو په پار موکې ورنهکړي.
د لوګر والي دا هم وویل، چې د کوچیانو د ستونزو د حل په پار ګډ کمېسیون جوړ شوی، چې په لوګر کې د کوچیانو د ستونزو د هواري ترڅنګ د قومونو ترمنځ یوالي راولي.
