د کندوز ولايت يو شمېر اوسيدونکي او مدني فعالان په هېواد کې د کورونا ويروس له خپرېدو سره د طالبانو له لوري د امنيتي ځواکونو پر پوستو له بريدونو هم وېره لري.
دوی په هېواد کې د جګړو له ښکېلو لوريو غواړي چې په دې سختو ورځو کې دې له جګړو لاس واخلي او دواړه دې د کورونا پر ضد مبارزه وکړي.
د کندوز مدني فعاله مرضیه رستمي وايي، دې او ملګرو له کورونا ويروس سره د مبارزې په برخه کې کمپاين پيل کړی؛ خو د طالبانو له لوري د امنيتي ځواکونو پر پوستو بريدونو د خلکو اندېښنې راپارولي چې د کمپاين مخه يې نيولې.
نوموړې په دې ولايت د جګړو له ښکېلو غاړو وغوښتل چې اوربند وکړي او د کورونا ويروس د مخنيوي په برخه کې ورسره همکاري وکړي.
د کندوز د امنيې قومندانۍ وياند هجرتالله اکبري وايي چې طالبانو په مرکز او ولسواليو کې په تېرو ۱۰ ورځو کې ۸ ځلې د امنيتي ځواکونو پر پوستو بريدونه کړي چې د امنيتي ځواکونو له مقاومت سره مخ شوي.
خو د طالبانو وياند ذبیحالله مجاهد سلاموطندار ته وايي چې طالبانو خپلو بريدونو کې ۴۰ سلنه کموالی راوستی.
د کندوز د سيمهييزو مسوولانو په وينا په ياد ولايت کې په دې وروستيو ورځو د طالبانو له لوري ۵ امنيتي ځواکونه وژل شوي او ۴ ټپيان دي او وايي چې ۱۰ طالبان وژل شوي او ۷ ټپيان شوي دي.
دا په داسې حال کې ده چې دولت په دې ورځو کې له کورونا ويروس سره د مبارزې په برخه کې ټوله انرژي مصرفوي؛ خو طالبانو بيا په دښتارچي، خاناباد، امام صاحب او د مرکز د ملي اردو، د ملي پوليسو او سيمهييزو پوليسو پر پوستو بريدونه کړي چې له کورونا سره د مبارزې په برخه کې يې د دولت هڅې پڅې کړې دي.
د ټول هېواد په کچه تراوسه د کورونا ویروس ۱۲۱ مثبتې پېښې ثبت شوي چې له دې ډلې ۳ يې مړه شوی او ۵ نور بيا چوړ شوي دي.
عامې روغتيا وزارت د کورونا ويروس د مخنيوي په برخه کې د هېواد لوی ولايتونه قرنطين کړي دي.
