د کورنیو چارو وزارت ویاند طارق ارین نن په يوه خبري کنفرانس کې وویل، طالبانو امریکا سره د سولې هوکړې له لاسلیک وروسته بېلابېلو ولایتونو کې د ملکي وګړيو او نظامیانو پر وړاندې څه باندې ۳ زره او ۵۰۰ ترهګریز بریدونه ترسره کړي دي.
ارين وايي، طالبانو یوازې تېره یوه اوونۍ کې ۲۹ ولایتونو کې د امنیتي ځواکونو پر وړاندې تر ۲۲۲ زیات تحرکات درلودل چې ۴۲۲ افغان امنیتي او دفاعي ځواکونه په کې وژل او ټپي شوي دي.
د کورنیو چارو وزارت ویاند زیاتوي چې د قطر د سولې له هوکړې وروسته د امنیتي ځواکونو پر وړاندې بریدونه، د عامه تاسیساتو په نښه کول، د امنیتي ځواکونو هدفي وژنې او پر دیني علماوو برید، د طالبانو د بریدونو تازه څپه ده.
ارین ټینګار کوي چې طالبان پر خلکو او حکومت د رواني فشار راوړولو لپاره پر دیني عالمانو برید ترسره کوي.
په همدې حال کې د ملي امنیت شورا ویاند جاوید فیصل دغه غونډه کې وویل، طالبانو د کوچني اختر ورځو کې له درې ورځني اوربند او د تاوتریخوالي له کموالي وروسته، بېرته تاوتریخوالی زیات کړ دی.
د فیصل په وینا، افغان دولت د اوربند درېیو ورځو او تر هغه وروسته فعاله دفاعي حالت غوره کړی، ترڅو د سولې بهیر مخ ته وړلو لپاره اړین باور رامنځته شي.
د ملي امنیت شورا ویاند ټینګار کوي چې طالبانو نه یوازې تاوتریخوالی زیات کړی، بلکې بېلابېلو ولایتونو کې یې د تاوتریخوالي کچې په زیاتولو سره د بېګناه افغانانو وژنې ته دوام ورکړی دی.
هېواد کې د ملکي وګړيو او نظامیانو پر وړاندې د طالبانو تاوتریخوالی داسې مهال زیات شوی چې ټاکل شوې ډېر ژر د حکومت له زندانونو د ۵ زره طالب بندیانو او د طالبانو له خوا د افغان دولت د زر بندیانو خوشې کولو بهیر بشپړ شي.
د ملي امنیت شورا د معلوماتو له مخې، ترواسه د حکومت له زندانونو شاوخوا ۳ زره طالب بندیان او د طالبانو زندانونو هم څه باندې ۳۰۰ د دولت زندانیان خوشې شوي دي.
