کندوز کې یوه کره امنیتي سرچینه چې نه غواړي نوم یې خپور شي سلاموطندار ته وايي، طالب وسلهوالو تېره شپه د کندوز ښار «د شرکت بڼ» سیمه کې د امنیتي ځواکونو په پوستو بریدونه کړي چې په کې ۱۵ د ملي اردو سرتېري او ۴ محلي پولیس وژل شوي.
سرچینه زیاتوي، چې طالبانو له برید وروسته د امنیتي ځواکونو ټول پوځي مهمات هم له ځانه سره وړي دي.
د کندوز د امنیې قومندانۍ ویاند هجرات الله اکبري د طالبانو بریدونه تاییدوي خو وايي، ۳ محلي پولیس په کې وژل شوي او ۲ نور ټپیان دي.
ویل کیږي برید کې طالبانو ته هم مرګژوبله اوښتې؛ خو تراوسه یې کره شمېر نه دی معلوم.
طالبانو دې برخه کې رسنیو ته څه نه دي ویلي.
د ۲۱۷ ميوند قول اردو د وياند مرستيال عبدالهادي جمال هم د امنيتي ځواکونو پر پوستو د طالبانو بريدونه تاييدوي؛ خو د اوښتې مرګژوبلې په اړه څه نه وايي.
په ورته وخت کې د جوزجان په اقچه ولسوالۍ کې د طالبانو په يوه بريد کې دوه پوليس وژل شوي دي.
د اقچې ولسوالۍ امنيې قومندان محمد ايوب رحماني وايي، دا بريد په ياده ولسوالۍ کې د ګازو د پايپ ليکې پر پوستې شوی دی.
رحماني زياتوي، په دې پېښه کې طالبانو ته هم مرګژوبله اوښتې ده؛ خو کره شمېر ورته نه دی معلوم.
طالبانو تر اوسه د يادو بريدونو په اړه څه نه دي ويلي.
دا داسې مهال دی، چې وسلهوالو طالبانو په تازهګۍ سره ویلي، له بهرنیو ځواکونو پرته یې د افغان ځواکونو پر وړاندې عملیات له سره پیل کړي دي.
د کورنيو چارو وزارت وياند نصرت رحيمي تېره ورځ وويل چې طالبانو په تېره يوه ورځ کې د افغانستان په ۱۷ ولايتونو کې ۳۳ بريدونه کړي چې په پايله کې يې۶ ملکيان وژل شوي او ۱۴ نور ټپيان شوي دي.
د نوموړي په وينا، په دې نښتو کې ۸ طالبان هم وژل شوي دي او ۱۵ نور نيول شوي هم دي.
