۱۵۰۰ دیني علماو د ( اپریل په ۳۰ مه) د کابل ښار په عبدالرحمان جومات کې سره راټول شوي و او د ځانمرګو بریدونو او چاودنو په اړه یې د اسلام سپیڅلي دین دریځ څرګند کړ.
دغو دینې علماوو وویل، چې ځانمرګي بریدونه او چاودنې حرامې دي او د بې ګناه خلکو وژل په اسلام کې جواز نه لري.
دا په داسې حال کې ده، چې په ننګرهار ولایت کې په وروستي ځانمرګي برید کې ۳۳ تنه ووژل شول.
د هېواد دیني علماوو له طالبانو نه د سولې د خبرو اترو غوښتنه وکړه او زیاته یې کړه، چې دوي د افغانستان د سولې له پروسې ملاتړ کوي.
د یادولو وړه ده، چې تر دې دمه د حکومت له لوري له طالبانو سره د سولې خبرو اترو او جګړې درولو کومه پایله نه ده ورکړې.
په دې وروستيو کې د هېواد په بېلابېلو ولایتونو کې د وسله والو طالبانو له لوري بريدونه زور اخیستی او په دې نښتو کې امنیتي ځواکونو او طالبانو ته درنې مرګ ژوبلې هم اوښتي.
له دې وړاندې د طالبانو د بریدونو په اړه د دینې علماو په چوپتیا ډېرو خلکو نیوکې کړې وې او نیوکه کوونکو دیني علما په بې پروايۍ تورن کړي و.
د کعبې شریفې د جومات امام شیخ خالد الغامدي په تازه ګۍ سره ویلي دي، چې طالبان او د اسلامي دولت ډله له اسلام سره هیڅ اړیکه نه لري او د دوی کړنې اسلامي توجیې نه لري.
الغامي زیاته کړې، چې دغه دوه ډلې خوارج دي او په اسلام کې ځای نه لري.
د کعبې امام له رسنیو سره په مرکه کې ویلي، د قرانکریم هغه ایات چې له کفارو سره د مبارزې په اړه نازل شوی د مسلمانو د وژونو له پاره یې دلیل ګرځوي.
