کندوزیان: پامیر ۱ عملیات بې ګټې و

امنیتي ځواکونو شپږ ورځې مخکې د کندوز ښار له شاوخوا پرتو کلیو د طالبانو وېستلو او د ښار له پاره د امنیتي کمربند جوړولو په موخه د پامیر ۱ په نوم عملیات پیل کړل.

د دغو عملیاتو په ترڅ کې سیمه ییزو امنیتي چارواکو اعلان وکړ، چې د پامیر ۱ عملیاتو په نتیجه کې یې د بوزکندهاري، ملاسردار، اورتبلاقيو، عربانو کلی او د ښار په شمال ختیځ کې یو شمېر کلي له طالبانو پاک کړي دي.

خو اوس د کندوز د شمال ختیځو شپږو کلیو اوسېدونکي وايي، چې طالبانو له امنیتي ځواکونو کلي بېرته نیولي او دوی کډه شوي دي.

د عربانو کلي اوسېدونکی خالدین شکایت کوي، چې امنیتي ځواکونه له طالبانو د نیول شویو سیمو په اړه بې تفاوتي کوي.

دی وايي، امنیتي ځواکونو له طالبانو ۸ نیول شوي کلي بېرته پرېښودلي، چې په پایله کې یې له دوو کلیو شاوخوا ۶۰۰ کورونه کډه شوي او د خپلوانو په کورونو کې دېره دي.

د اورتبلاقي کلي بل استوګن حمیدالله سلام وطندار سره په خبرو کې وویل، چې د امنیتي ځواکونو له خوا د ښار په شاوخوا سیمو او کلیو کې د پامیر ۱ عملیاتو ګټه ونه کړه.

د کندوز ولایت د کډوالو او بېرته راستنېدونکو چارو رییس عبدالسلام هاشمي تاییدوي، چې د کندوز ښار له شاوخوا کلیو سلګونه کورنۍ کډه شوي دي.

دی وايي، چې ۴۰۰ کډوالو کورنیو د مرستو په خاطر عریضې ورکړي دي.

د کندوز د والي ویاند سید محمود دانش هم د شمال ختیځو کلیو د سلګونو کورنیو بې ځایه کېدل مني، خو وايي، چې له بې ځایه شویو کورنیو سره د مرستو په خاطر هڅې روانې دي.

خو دانش له تصفیه شویو سیمو د امنیتي ځواکونو شاتګ ردوی.

د والي ویاند وايي، امنیتي ځواکونه لومړی د ښار امنیتي کمربند جوړوي او بیا

له طالبانو د کلیو پاکولو په موخه عملیات کوي.