د چارو یو شمېر شنونکي وايي، د ولسمشر له خوا د حقیقت موندونې کمېسیونونه د عمومي افکارو قناعت له پاره ټاکل کیږي او کارونه یې د پام وړ نه دي.
په دې وروستیو کې افغان ولسمشر غني د کندوز پېښې د څېړلو له پاره یو کمېسیون ته دنده وکړې ده.
په دغه کمېسیون کې د پوهنې پخوانی وزیر فاروق وردګ او د ملي امنیت پخوانی رییس امرالله صالح ته دنده سپارل شوې ده، چې د کندوز ولایت وروستۍ پېښه په کره ډول و څېړي.
خو په ورته وخت کې ځېنې شنونکي د دغه کمېسیون کار او پایلو ته له بېلا بېلو زاویو ګوري.
په تېرو ۱۴کلونو کې دا لومړی ځل و، چې وسله والو طالبانو د یو ولایت مرکز ونیوه.
۱۲ ورځې وړاندې طالب اورپکو له څو لورو څخه پر کندوز ښار برید وکړ او دغه ښار یې دریې ورځې په ولکه کې و.
د نظامي چارو شنونکي او پخواني جنرال عتیق الله امرخېل د کندوز پېښې ارزونې له پاره د ولسمشر له لوري د ټاکل شوي کمېسیون په اړه وویل، د دغه کمېسیون جوړولو له پاره هیڅ اړتیا نه شته او زیاته یې کړه، چې د حکومت په اډانه کې د دا ډول پېښو ارزولو له پاره اداره موجو ده.
امر خېل له سلام وطندار سره په خبرو کې وویل، چې د کمېسیونونو ایجادول زیات وخت فرمایشي اړخ لري او لاسته رواړنې هم نه لري.
ده وویل، غوره به وي، چې د دغو کمېسیونونو پر ځای د پېښو سره د مبارزې پر ادارې تمرکز وشي.
د ولسي جرګې وکیل او د پوهنتون استاد سید قیوم سجادي د کندوز ولایت د جوړ شوي حقیقت موندونکي کمېسیون په اړه سلام وطندار ته د ټیلیفون په کرښه وویل، کوم کمېسیونونه چې د پېښو د ارزولو او څېړلو له پاره د ولسمشر له لوري جوړ شوي دي د ارزونې له پاره ټاکل شوي معیارونه نه لري.
ده وویل، چې د مشخصو معیارونو نه لرل د دې لامل کیږي، چې سلیقوي کارونه وکړي.
سجادي دا مني، چې دغه کمېسیونونه د عمومي افکارو قناعت له پاره ټاکل کیږي او کارونه یې د توجیې وړ نه دي.
د جرګې دغه غړي وویل، د کندوز پېښې حکومت پرېشانه کړی دی، خو که حکومت د دغه ډول پېښو په اړه جدي عمل وکړي د کمېسیونونو ګومارلو ته اړتیا نشته .
خو له بل لوري د چارو د ادارې د سیاسي، کلتوري او ټولنیزو چارو ریاست رییس میاګل وثیق د کندوز پېښې له پاره د ځانګړي کمېسیون ټاکلو لامل د پېښې لویوالی او د ریښې پیداکول په ګوته کړل.
وثیق وايي، چې د کندوز پېښې د لامل څېړل د یوې ادارې له توان څخه وتلی کار دی او وايي، اړینه وه، چې ولسمشر داسې یو کمېسیون ته دنده ورکړی وی.
میاګل وویل، چې د ټولو قضیو د څېړلو له پاره زیات وخت ته اړتیا ده.
ولسمشر له دې مخکې د جلریز، شاه شهید او یو شمېر نورو پېښو د ریښې معلومولو له پاره هم ځانکړي کمېسیونونه ټاکلي وو.
