چینايي رسنۍ وايي، هغه ځوان ډاکټر چې د لومړي ځل لپاره یې په چین کې د کرونا ویروس د پیدا کېدو خبرداری ورکړی و، د همدغه ویروس له کبله ووژل شو.
ډاکټر لي ونلیانګ چې ۳۴ کاله عمر یې درلود او د چین په ووهان ښار کې ډاکټر و، په تېره ډسیمبر میاشت کې یې دغه ویروس وپېژنده.
د چین د ووهان ښار پولیسو له هغه وروسته چې ډاکټر لي د سارس ناروغۍ په څېر د یوې بلې ناروغۍ د پیدا کېدو خبر ورکړ، له نوموړي وغوښتل چې په اړه یې هېڅ ونه وايي او دا خبرداری یې هم ورکړی و چې ښايي د عامه ذهنیتونو د ګډوډولو او پر دروغو ولاړو معلوماتو د خپرولو له کبله ونیول شي.
چین پرون اعلان وکړ چې په دغه هېواد کې پر کرونا ویروس د اخته کسانو شمېر ۲۸ زره کسانو ته ورسېده.
د چین روغتیايي سرچینو خبر ورکړی چې تر دوو ورځو وړاندې پورې د یاد ویروس له کبله ۵۶۴ کسانو خپل ژوند له لاسه ورکړی دی.
پر چین سربېره، د نړۍ په ۲۷ نورو هېوادونو کې هم پر کرونا ویروس خلک اخته شوي دي.
اړوند مطالب:
