افغانستان بوییچه ساغلیقنی سقلش وزیرلیگی نینگ ایتیشیچه، اوتگن 24 ساعت جریانیده کرونا ویروس گه شبههلی 1200 کیشیدن آلینگن نمونه سیناویده 21 ولایتده 581 کیشی نینگ نتیجهسی مثبت تشخیص قیلینگن.
افغانستانده کرونا ویروس رواجلنگنیدن بویان بو رقم کرونا ویروس گه چلینگن کیشیلردن اینگ یوقاری رقم بولیب و چلینگنلردن کوپینچهسی کابل، ننگرهار، بلخ، هرات و لغمان ولایتلریده قید ایتیلگن.
مملکت ده اوتگن 24 ساعت جریانیده رویخط گه آلینگن ینگی واقعهلر شامل کرونا ویروس گه چلینگنلرنینگ رقمی 7 مینگ و 653 کیشی گه ییتیشگن.
ساغلیقنی سقلش وزیرلیگی مسؤوللری نینگ ایتیشلریچه، اوتگن بیر کیچه-کوندوز ده کرونا ویروس کسللریدن 5 تهسی جان بیرگن و باشقه 49 تهسی قیته ساغهیگنی معلوم قیلینگن.
مذکور وزیرلیک تامانیدن بیریلگن رقم اساسیده، اوتگن 24 ساعت جریانیده 165 کیشی کابل ده، 134 کیشی ننگرهار ده، 55 کیشی بلخ ده، 38 کیشی هرات ده، 30 کیشی لغمان ده، 29 کیشی پکتیا ده، 23 کیشی سمنگان ده و 21 کیشی غزنی ده کرونا ویروس گه چلینگنلری معلوم بولگن.
شونینگدیک، کنر ده 16 کیشی، سرپل ده 15 کیشی، بادغیس ده 13 کیشی، تخار ده 12 کیشی، پنجشیر ده 9 کیشی، بغلان ده 5 کیشی، قندوز ده 4 کیشی، پروان ده 4 کیشی، پکتیکا ده 3 کیشی، خوست ده 2 کیشی و بدخشان، دایکندی و میدانوردک ده بیر-بیر کیشی نینگ کرونا سیناوی مثبت اعلان بولگن.
افغانستانده کرونا ویروس گه چلینگنلردن حاضرگهقدر 850 کیشی قیته ساغهیگن و 178 کیشی جان بیرگن.
عین دمده، دنیاده کرونا ویروس گه چلینگنلرنینگ رقمی 4 میلیون و 894 مینگ کیشی گه ییتیشگن و بو جمله دن 320 مینگ دن آرتیق کیشی جان بیرگن و باشقه بیر میلیون و 909433 دن آرتیق کیشی قیته ساغهیگن.
