افغانستان جمهور رئیسینینگ بیرینچی اورین باسری جنرال عبدالرشید دوستمنینگ طرفدارلریدن مینگلرچهسی، بوگون جوزجان و تخار ولایتلریده سیلاولر ایرکین کمیسیونینینگ ولایتی دفترلرینی باغلهگن.
اعتراضچیلر استیکر اوریلگن کیملیکلرنی یاندیریب و مرکزی حکومتنی آگاهلنتیریشیچه، بوندن سونگ جمهور رئیسنینگ قومی تبعیض و قدرت طلبلیگیگه کیسکین جواب بیرهمیز.
جوزجان ولایتیده جنبش یاشلری باشلیغی قدرتالله وطننینگ ایتیشیچه، حکومت اولرنینگ ایستکلریگه جواب بیرمهگن صورتده، ولایتلرده سیلاولر ایرکین کمیسیونینینگ ولایتی دفترلری آچیلمهیدی.
شونینگدیک، تخار ولایتیده جنرال دوستمنینگ طرفدارلریدن یوزلرچهسی حکومت گه قرشی شعارلر بیریب و مذکور ولایتده سیلاولر ایرکین کمیسیونینینگ ولایتی دفترینی باغلب آگاهلنتیریشیچه، ایستکلریگه جواب بیریلمهگن صورتده، جدی عکسالعمل کورستهدیلر. اوشبو ولایت اعتراضچیلرینینگ ایتیشیچه، اولرنینگ برابریده حکومتنینگ حرکتی شوندهی بیر شکلده دوام قیلگن حالتده، ایریم ولایتلرده سیلاولر ایرکین کمیسیونینینگ برچه ولایتی دفترلرینی باغلهیدیلر.
عین کونده سمنگان، فاریاب و هرات ولایتلری هم ناراضیلیک نمایشلرگه گواه بولگن. مذکور ولایتلرده هم اعتراضچیلر حکومتنی هدف قرار بیرگنلر. بو آرهدن فاریاب اعتراضچیلرینینگ آگاهلنتیریشیچه، حکومت جنرال دوستم مملکتگه قیتیشی توغریسیده زمینه یرهتمهگن صورتده، یوناما دفتری و انسان حقلری کمیسیونینینگ نمایندهلیگینی یاپهدیلر.
