د امريکا د پارلمان پر سياسي سالون بريد کوونکي اقرار کړی، چې د امريکا دمتحده ايالاتو د ولسمشر بارک اوباما د وژلو پلان درلود.
رویټرز خبري اژانس ليکي، چې د کرسټوفرکونيل په نوم د امريکا د اوهايو ایالت اوسېدونکي په خپله يوه مرکه کې ويلي، که چېرې دی د امريکا (ايف، بي، ای) د پولیسو له لورې نه وی نیول شوی؛ نو په امريکا کې اسراييلي سفارت خانو او د دغه هېواد د پارلمان (کپيټل هال) یا سياسي سالون ته یې پايپي بم اېښودلو پلان عملي کاوه.
د بون کاونټي په نوم له جيل څخه دغه زنداني په ټېلفوني اړيکه کې د مرکې پر مهال ويلي: " ما خپله تومانچه پورته کوله او د امريکايي ولسمشر بارک اوباما په سر مې کېښوده او د ډز سره به مې له منځه وړه.
له هغه وروسته مې د امريکا په نورو ځايونو کې د اسرايلو سفارت خانو باندې هم ډزونه کول او ټول هغه کسان مې وژل، چې اوس د مسلمانانو پر وړاندې جنګ کوي او زمونږ وينې بهوي."
کرسټوفر ويلي، ده ته د امريکا له سرحد نه بهر د اسلامي هېوادونو ورونو دنده ورکړې وه، چې باید د دوی حکم عملي کړي.
د اوهايو اوسیدونکی او زنداني وايي: " زما ورونه په عراق اوشام کې دي، هغوی ماته په غرب کې د جهاد کولو حکم کړی دی او ماهم هماغسې وکړل."
داسې ويل کيږي، چې کرسټوفر د ۲۰۱۴ کال اګست میاشت کې دغه بريد پلان کړی و او له نيول کېدو وروسته دا جوته شوه، چې دغه تورن په خپل ټويټر پاڼه کې هم د داعش ډلې لپاره تبلیغات کول او د دغې ډلې انځورونه يې په خپله پاڼه کې خپرول.
د امريکا له محکمو څخه لاس ته راغلي اسناد ښیي، چې کورنيل د خپلو اړوندو اشخاصو او ګروپ په اړه معلومات هم ورکړي دي.
د امريکا د ایف بي ای يو پولیس ویلي، چې کورنيل يې هغه مهال ګرفتار کړ، چې غوښتل يې د پايپ بم جوړولو لپاره تحقيقات وکړي.
پوليس زياته کړې، چې کورنیل چاوديدونکي توکي اخيستي و او غوښتل يې واشنګټن ته سفر وکړي او هلته خپل پلان ته د عمل جامه واغوندي.
د دغه زنداني تر اوسه چا ضمانت نه دی کړی، خو د قتل، سلاح ساتلو او د ستر جرم په کولو متهم دی.
له دې وړاندې ایف بي اې پولیسو هم خبرداری ورکړی و، چې ځينې امريکايي ځوانان غواړي په منځني ختيځ کې د داعش ډلې سره يوځای شي.
