د کاپیسا د کوهستان لومړۍ حصې ولسوال حمزه وهاب صافي سلاموطندار ته وویل، وسلهوال غلو تېره شپه د دغې ولسوالۍ «موریِ خُمزرګر او پُلِمُغلان» سیمه کې یوه کور ته دننه شوي چې ۲ وروڼه او د هغوی یو مېلمه یې وژلی دی.
صاپی د پېښې د لاملانو هویت په اړه څه نه وايي، خو ټینګار کوي چې سيمه کې له ناپېژانده وسلهوالو یو جسد او یو ټپي هم پاتې شوی دی.
په ورته وخت کې د سیمې یو شمېر اوسېدونکي وايي، دغه پېښه کې د درېیو وژل کېدو ترڅنګ ۲ نور ملکي وګړي ټپیان شوي هم دي.
دې سره کاپیسا کې یو شمېر مدني فعالان دغه ولایت کې د ناامنیو له زیاتېدو اندېښنه ښيي.
