کانکور سیناوی سهمیه‌بندلیک ریجه‌سی‌گه قرشی عکس‌العمل‌لر دوامیده، بوگون نماینده‌لر کینگشی‌نینگ عمومی ییغینیده نماینده‌لردن بیرقطاری، بو ریجه‌نی قانون گه قرشی بیلیب و نماینده‌لر کینگشی رهبرلیگی‌دن کابینه‌نینگ قانون گه قرشی آلگن قراری برابریده جدی موقف آلیشی‌نی طلب قیلگن‌لر.
اولرنینگ ایتیشیچه، کانکور سیناوی‌نی سهمیه‌بندلیک قیلیش مملکت‌نینگ یوتوق‌لیک‌لریگه توسیق بوله‌دی.
نماینده‌لر کینگشی اعضالریدن بیری عارف رحمانی‌نینگ ایتیشیچه، دولت مسوول‌لرنینگ کانکور سیناوی‌نی سهمیه‌بندلیک قیلیش اورنیده، اوقووچی‌لر اوچون یخشی تحصیل قیلیش زمینه‌سی‌نی یره‌تیشی کیره‌ک.
عین‌حالده، نماینده‌لر کینگشی اعضالریدن باشقه بیری سیدعلی کاظمی، شو موضوع خصوصیده جواب بیریلیشی اوچون عالی اوقوو وزیری چقیریلیشی‌نی طلب قیلدی.
بیراق نماینده‌لر کینگشی اعضالریدن باشقه بیر قطاری‌نینگ ایتیشیچه، کانکورنی سهمیه‌بندلیک قیلیش ریجه‌سی سمتی و قومی ایمس.
اولرنینگ ایتیشیچه، ناتینچ ولایت‌لرنینگ کوپ قطار یشاوچی‌لری تحصیل قیلیش‌دن محروم قالگن و اولرگه تحصیل قیلیش زمینه‌سی‌نینگ یره‌تیلیشی کیره‌ک.
نماینده‌لر کینگشی‌نینگ کاتبی امیرخان یار، بوگون "دوشنبه" اوشبو کینگش ییغین‌نی مدیریت قیلیب تحصیلی کمیسیون‌گه بو توغریده جدی اقدام قیلیب و کانکور سیناوی‌نی سهمیه‌بندلیک قیلیش موضوع‌سینی بیللی قیلیش دستورینی بیرگن.
کانکورنی سهمیه‌بندلیک قیلیش ریجه‌سی اوتگن هفته کابینه تامانیدن تصدیق‌لنیب، بیراق اوشبو ریجه اجتماعی ترماقلر ایشلاوچی‌لری‌نینگ جدی قرشی‌لیک‌لری بیلن دوچ کیلگن.
