قندهار ولایتی والسی نینگ مهمانخانهسیده صادر ایتیلگن پارتلشنی قوراللی طالبلر ایشی دیگن ملی خوفسیزلیک کینگشی نینگ مصلحتچیسی، مذکور پارتلشده هنوزگچه افغانستانده سابقهسی بولمهگن مادهدن ایش آلینگن دیگن.
قندهارگه سفر قیلگن ملی امنیت کینگشی نینگ مصلحتچیسی محمد حنیف اتمر، قوراللی طلبلر مذکور هجوم مسوولیتینی ذمه سیگه آلسین یا – ده آلمهسین پارتلش بو حرکت تامانیدن صادر ایتیلگن لیگینی اظهار قیلگن. افغانستان خلقی بو حرکتنی هیچ زمان کیچیرمیدی دیگن او.
جناب اتمرگه کوره، اوشبو پارتلشده قندهی مواد ایشله تیلگنلیگی فنی لحاظدن اورگهنیلیشی اوچون جمهور رییس غنی تامانیدن مخصوص بیر گروه وظیفهدار ایتلگن لیگینی بیلدیرگن. تحقیقات نینگ نتیجهسی سونگ اعلان ایتیلهدی دیگن جناب اتمر.
بیر کونده کابل، هلمند و قندهار ولایتلریده اوچ انتحاری هجوم صادر ایتیلگن لیگی خصوصیده اشاره قیلگن ملی خوفسیزلیک کینگشی نینگ مصلحتچیسی، درست امنیت تامین ایتیلمهگن لیکدن علاوه هجوم آلدین دن پلانلشتیریلگن ایکن لیگینی تیلگه آلگن.
حکومت نینگ بو یوقاری مرتبهلی رسمیسی، قندهار حادثهسیده تن جراحتی آلگنلرنی یقیندن کوزهتیب اولرنینگ ساغلیق احوالی یخشی دیگن.
لیکن، اوتگن کون اخبارات واسطهلریگه گپیرگن قندهار امنیه قوماندانی جنرال رازق هجوم حقانی ترور ترماغی همکارلیگی بیلن (آی اس ای) جاسوسلیک ادارهسی تامانیدن عملگه آشیریلگن دیگن ایدی.
بوندهی هجوملرنی ذمهسیگه آلیب کیلگن طالبلر بو پارتلش مذکور حرکت تامانیدن صادر ایتیلگن لیگینی رد قیلیدی و هنوزگچه هم باشقه تروروچی گروهلر حادثه مسوولیتینی بوینیگه آلمهگن.
قندهار ولایتی والیسینینگ مهمانخانهسیده بوندن ایکّی کیچه آلدین عملگه آشیریلگن پارتلش نتیجهسیده بیرلشگن عرب امیرلیگی نینگ ایلچیسی داخل ولایت والیسی همایون عزیزی تن جراحتی آلگن ایدی. شونینگدیک بیرلشگن عرب امیرلیگی نینگ بیش دیپلوماتی داخل 11 کیشی حیاتدن کوز یومدی.
