نماینده‌لر کینگشی‌نینگ گزارشی، کانلر و پترولیم وزیرلیگی‌ده‌گی سیستماتیک اداری فساد و قانون گه قرشی ایش‌لرنی آچیقله‌دی.
نماینده‌لر کینگشی‌نینگ ینگی گزارشی گه کوره، کانلر و پترولیم وزیرلیگی‌نینگ سرپرستی نرگس نهان، سونگی بیر ییل جریانیده آیلیک‌لری 80 مینگ افغانی‌دن باشله‌نیب 300 مینگ افغانی گچه بولگن 161 مصلحتچی تعیین قیلگن.
نماینده‌لر کینگشی‌نینگ ییر بوتونلیگی، سوو و برق، یشش محیط و طبیعی منبع‌لر کمیسیونی‌نینگ گزارشی‌ده کیلیشیچه، کانلر و پترولیم وزیرلیگی‌نینگ 48 ریاستی‌دن 30 ریاستی سرپرست‌لر تامانیدن اداره بوله‌دی.
اوشبو سرپرست‌لر اداری اصلاحات اداره‌سی‌نینگ سیناوی آرقه‌لی تعیین ایتیلمه‌گن و شونینگدیک، مذکور وزیرلیک‌نینگ رسمی ایشلاوچیسی ایمس دیر.
یشش محیط و طبیعی منبع‌لر کمیسیونی‌نینگ اعضالریدن بیری محی‌الدین مهدی‌نینگ ایتیشیچه، جمهور رئیس‌نینگ حکمی اساسیده، مذکور وزیرلیک‌نینگ ریاست‌لریدن 5 قراردادی ایشلاوچی ایش‌دن بوشه‌تیلگن؛ لیکن بو ایشلاوچی‌لر حاضرگچه ایشلریگه دوام بیره‌دیلر.
نماینده‌لر کینگشی‌نینگ یشش محیط و طبیعی منبع‌لر کمیسیونی، کانلر و پترولیم وزیرلیگی‌نینگ ایشلری تیکشیریلیشی اوچون خاص بیر کمیسیون تعیین ایتیلیشی‌نی سوره‌دی.
بیراق، کانلر و پترولیم وزیرلیگی مسؤوللری‌نینگ ایتیشیچه، مذکور وزیرلیک اصلاحات و شفافیت اوچون کوره‌شه‌دی و شونینگدیک، حاضرگچه بو توغریده کوپینچه یوتوقلر قولگه کیریتگن.
کانلر و پترولیم وزیرلیگی‌نینگ سوزلاوچیسی عبدالقدیر مطفی، سلام‌وطندارنینگ سوراقلریگه آچیق و ایرکین شکلده جواب بیرمه‌یدی؛ بیراق اورغولشیچه، کانلر وزیرلیگی‌نینگ مدیریتی سالم دیر و برچه نرسه یخشی بیر شکلده باشقریله‌دی.
عین حالده، نماینده‌لر کینگشی‌نینگ باشلیغ‌لیگی، یشش محیط و طبیعی منبع‌لر کمیسیونی گه وزیرلیک سرپرست‌لیگی شامل مذکور وزیرلیک‌که دخیل کیشی‌لردن توپلنگن حجت و دوسیه‌لرنی باش قاره‌لاوچیلیک‌که تاپشیریشی توغریسیده بویروغ بیردی.
