رسمی اسلام آباد افغانستان دولتی بیلن جنگری طالبلر اورتهسیده تینچلیک مذاکرهلرینی باشلش اوچون امیریکه قوشمه ایالتلری، چین، افغانستان و پاکستان نمایندهلری ارا تورت تامانلمه ییغین مجلسینینگ بیشینچی دوری پایتخت اسلام آباد ده اوتکزیلیشینی اعلان ایتگن.
افغانستان حکومتی پاکستاننینگ بلند مرتبهلی عملدارلرینی اوز وعدهلریگه وفادار قالمهگن لیکلری اوچون اوشبو ییغینده قتنشمسلیگینی اعلان ایتگن ایدی. اما، چهارشنبه کون مملکت تشقی ایشلر وزیرلیگی اورین باسری اوشبو ییغینده افغانستاننینگ اسلام آباد دهگی ایلچیسی حضرت عمر زاخیلوال اشتراک ایتیشینی بیلدیردی.
در حقیقت تورت تامانلمه ییغیننینگ بیشینچی مجلسی بیر نیچه وقتلیک تنفسدن سونگ قیته اوتکزیلهدی. رسمی کابل تورت تامانلمه ییغیننینگ تورتینچی مجلسی اوتکزیلگنیدن سونگ پاکستاننی طالبلر نمایندهلرینی تینچلیک مذاکرهلری میزیگه آلیب کیلیشینی کوتر ایدی. بیراق، کابلنینگ انتظاری ایجابی نتیجه آلیب کیلمهدی. عکسینچه بهار موسمی کیلیشی بیلن آق طالبلر تامانی مذاکرهلر اورنیگه اوروشنی تَنلب افغانستاننینگ ایریم منطقهلری اینیقسه شمال ولایتلریده اوزلرینینگ یازگی حملهلرینی باشلهدیلر.
افغانستان دولتی پاکستان بیلن افغانستانده برقرارلیکنی تامینلش بارهسیده آلیب باریله دیگن سیاسی بحثلر و مذاکرهلر بیهوده ایکنینی توشینگن حالده، مذاکرهلر خصوصیده امیدسیز ایکنینی اعلان ایتدی. افغانستان رهبری دوکتور محمد اشرفغنی افغانستان ملی مجلسینینگ فوق العاده ییغینیده حکومتینینگ پاکستان بیلن علاقهلری همده طالبان بیلن مذاکره اوتکزیش بارهسیدهگی ینگی موقفینی آچیق آیدین بیر شکلده بیان ایتگن ایدی.
جناب غنی طالبلرنینگ اوزلری مذاکرهلر گه بویین ایگمه گونگه قدر اولر گه محکم ضربهلر بیریش لازم لیگینی تاکیدلب افغانستان حربی کوچلریگه مملکتنینگ ایریم حدودلریده طالبلر مرکزلرینی یوق ایتیش اوچون حربی عملیاتلر اوتکزیشلری توغریسیده بویروق بیرگن ایدی.
افغانستان و پاکستان مناسبتلری جاری آیده پایتخت کابلده ملی امنیت ادارهلریدن بیریگه اویوشتیریلگن قانلی هجومدن سونگ تاباره ترهنگ لشگن ایدی. جمهور رییسغنی هلیگچه بیر نیچه بار پاکستاننی افغانستانگه قرشی اعلان ایتلمهگن اوروشنی دوام ایتدیریب کیله یاتگنینی تیلگه آلگن. او اوزینینگ مملکت ملی مجلسیده قیلگن سونگی چیقیشیده پاکستاندن بیرلشگن ملتلر تشکیلاتینینگ امنیت کینگشیگه رسمی شکایت یازیشی بارهسیده هم آگاهلنتیرگن ایدی.
رسمی کابل تورت تامانلمه ییغیننینگ قرارلری پاکستان دولتی طرفیدن عملده تطبیق ایتیلمهگنیدن هم شکایت قیلهدی. اوشبو ییغین اشتراکچیلری سیاسی مذاکرهلرگه حاضر بولمهگن طالبلرگه قرشی بیرگهلیکده عمل قیلیشلری بارهسیده کیلیشیب آلگن ایدیلر.
رسمی اسلام آباد پاکستاننی بو توغریده اوز وعدهلریگه صادق ایمس لیککه عیبلب، طالبلرگه کیرهکلی پیمانهده باسیملر اوتکزمه یاتگن لیککه متهم ایتهدی. بیراق، اسلام آباد بلند مرتبهلی رسمیلری مذاکرهلر اوتکزیش اوچون آزگینه امید لر بار بولگن تقدیرده هم طالبانگه قرشی کوچ ایشلهتیش ضرور ایمس لیگینی تاکیدلهیدی لر.
افغانستاننینگ اسلام آباد دهگی ایلچیسی حضرت عمر زاخیلوال تورت تامانلمه ییغیننینگ بیشینچی مجلسیده بیر قطار مهم قرارلر قبول قیلینیشی ممکن لیگی بارهسیده سوز یوریتگن.
باشقه تاماندن بوندن بیر نیچه کون آلدین افغانستان حکومتی نینگ اجراییه ادارهسی رییسی داکتر عبدالله عبدالله چینگه سفر قیلیب، مذکور مملکتنینگ بلند مرتبهلی رسمیلری بیلن افغانستانده برقرارلیک اورنهتیش بارهسیده مذاکره اوتکزگن ایدی. جناب عبداللهعبدالله چین رسمیلریدن اوز نفوذیدن فایده لنیب پاکستاننی افغانستانده سیاسی یوللر آرقلی برقرارلیک اورنهتیش بارهسیده کوپراق ترغیب ایتیشینی سورهگن ایدی.
چین و امیریکه قوشمه ایالتلرینی پاکستانگه باسیم لر اوتکزیش کوچی و امکانلری ایگه ایکنی هیچ کیمگه سر بولمسه کیره ک. کورینیشیچه ایریم سببلر گه کوره، بو ایکله ییریک دولتلر افغانستانده برقرارلیک تامین لنیشی بارهسیده پاکستانگه کیرهکلی باسیملر اوتکزهمی کیلماقده لر.
گرچند کیینگی وقتلرده امیریکهنینگ ایریم سیاسی و امنیتی تیورهکلریده پاکستاننی افغانستانده تینچلیک اورنه تیلیشی بارهسیده رسمی کابل همده واشنگتن بیلن کوتیلگن اندازه ده همکارلیک قیلمهگنی توغریسیده گپیریلهدی. امیریکه نینگ بعضی بیر نشرلری رسمی واشنگتننی پاکستانگه قرشی جدی باسیملر و تضییقلر اوتکزیلیشی ضرورتی اوستیده هم تاکیدلب کیلهدی لر.
بوکونگه قدر افغانستان دیپلوماسی ادارهسینی پاکستان توغریسیده ضعیف عمل قیلگنی هم رسمی اسلام آبادنی سیاسی میداندهگی اویینلرده اوز فایدهسیگه یخشی فایده لنیب دنیانینگ کوچلی دولتلرینی افغانستانده برقرارلیک اورنهتیش مسالهسیگه جدیت بیلن اورونمه یاتگن لیکلریگه باعث بولگن. افغانستان دولتینی اوشبو اویین لرده یخشی رول اوینهشی اوچون سیاست میدانیده فعال راق بولیشی گه جدی احتیاج سیزیلهدی. گر چند اوروش میدانلری ده قولگه کیریتیله دیگن یوتوقلر هم اوزیگه خاص تاثیرگه ایگه.
رسمی کابل نینگ تورت تامانلمه ییغیننینگ بیشینچی مجلسیگه امید سیزلیک بیلن باقه یاتگنیگه قرهمی، اوشبو مذاکرهلرنی افغانلر یورتیده برقرارلیکنی اورنهتیش سری تشلنه دیگن قدملردن بیری ایکنی دیب حسابگه آلیش ممکن.
