افغانستان حکومتی بوگون (چهارشنبه) گلبدین حکمتیار رهبرلیگیدهگی اسلامی حزب بیلن تینچلیک لایحهسیگه قول قویدی. کیلیشوو کابلده افغانستان عالی تینچلیک کینگشی باشلیغی اوییده امضالندی.
بوگون توشدن سونگ انه شو مناسبت بیلن اوتکزیلگن ییغینده سوزلهگن، حکومت اجراییه ریاستینینگ بیرینچی اورین باسری انجینیرمحمدخان لایحهنی خوش قرشیلیب، مذکور کیلیشووده حکمتیار ییتکچیگیدهگی اسلامی حزب هیچ قندهی امتیاز سورهمهگن دیگن.
اوشبو کیلیشوو کیریش سوز، اوچ فصل و 26 مادهدن عبارت ایکنلیگی ایتیلهدی. اوچ فصلدن عبارت مذکور لایحهگه کیلیشوونینگ اساسی اصولی تامانلرنینگ مجبوریتلری و باشقه موردلر سیغدیریلگن.
اجراییه ریاستینینگ بیرینچی اورین باسری، قوراللی طالبلر اوروشنینگ ایکینچی فصلینی باشلگن نازوک بیر شرایطده، اسلامی حزب قوراللی توقنشوولردن قول کوتاریب، تینچلیک لایحهسیگه قوشیلیشی مملکت سیاسی تقدیری اوچون ییریک اهمیتی بارلیگینی ایتگن.
مذکور لایحهگه موافق، حاضرگی کونده پاکستانده استقامت قیلهدیگن اسلامی حزب نینگ طرفدارلری مملکتگه قیتیشی و بو حزبنینگ مملکت تورمهلریده سقلنه دیگن اعضالرینینگ دوسیهسی تیکشیریلگندن کیین تورمهدن چیقاریلیشی کوتیلهدی.
شونینگدیک جناب محمدخان، اسلامی حزب اعضالری تورمهدن آزاد ایتیلیشی همده مملکتدن خلق ارا کوچلری چیقاریلیشی شرطسیز هیچ قندهی کیلیشوگه قول قوییلمهگن لیگینی بیلدیرگن.
اوز نامی فاش ایتیلمسلیک شرطی بیلن سلاموطندار ترماغیگه سوزلهگن بیر منبع، اسلامی حزبنینگ کابلدهگی بولیمی گلبدین حکمتیارنی تینچلیک لایحهسیگه قوشیلگنلیگینی خوش قرشیلیب بیرهم قیلدیر دیگن.
