کابل ښاریان: د اوبو رسولو یو خصوصي شرکت مو پیسې حیف و میل کړي دي

د کابل ښار ۱۵ ناحیې اوسېدونکي شکایت کوي، چې د څښاک اوبو رسولو یو خصوصي شرکت له دوی څخه په را ټولې کړو پیسو سوداګري کوي.

د دغې سیمې اوسېدونکي وايي، چې د خالق یار پیوندي په نوم د اوبو رسولو خصوصي شرکت د یادې ناحیې له هر کور څخه دوی ته د څښاک اوبو د ورسولو په بدل کې ۱۵زره افغانۍ را اخیستي دي.

د ۱۵ ناحیې اوسېدونکی محمد حسن سلام وطندار سره په مرکه کې وویل، چې د "یارپيوند" شرکت سره یې تړون کړی و، چې د لسو کلونو له پاره به دغه شرکت دغو شمېر کورنیو ته د څښاک اوبه راوړي، خو د یو کال په تېرېدو سره دوی ته یې تر اوسه پورې اوبه نه دي رسولي.

دغه خلک وايي، چې یاد شرکت د اوبو په بهانه له هر کور څخه د دویم ځل له پاره ۳۵۰۰ افغانیو غوښتنه کړې ده، چې د شرکت دغه کار د تړون خلاف دی.

د کابل ښار د ۱۵ ناحیې اوسېدونکو سلیم شاه او ایمل سلام وطندار سره په خبرو کې وویل، چې د ناحیې د خلکو او شرکت تر منځ په لاس لیک شوي تړون کې راغلي دي، چې دوی به لس کلونو دوی ته اوبه رسوي.

دغه خلک وايي، چې دوی د اوبو د نشتوالي له سختې ستونزې سره مخ دي او دغه شرکت پوره یو کال هم اوبه نه دی ور رسولي.

د دوی پر خبره، څو ځلې ماشومان د اوبو راوړلو له امله د اوبو تر ټانکر لاندې شوي دي او وژل شوي دي.

د ناحیې خلکو سلام وطندار سره په خبرو کې وویل، چې ۵ تنه ماشومان تر اوسه پورې د اوبو د راوړلو له امله په لاره کې د ټانکر لاندې شوي دي او وژل شوي.

په ورته وخت کې د خالق یارپیوندي د شرکت رییس نوروز وایي، چې محیطي ستونزې او د اوبو د سطحې ټېټدل د دې لامل شوي چی د ۱۵ ناحیې خلکو اوبه بندې شي.

د نوروز په وینا، چې دوی به د ۱۵ ناحیې د اوسېدونکو له پاره اوبه له بل ځای څخه اوبه ورکړي او په دې برخه کې ۵۰ سلنه کار یې پای ته رسېدلی.

د خالق یار پیوندي د شرکت مشر زیاتوي چې تر یوې میاشتې به دوی د اوبو نل لیکې وغځوي او د ۱۵ ناحیې د اوسېدونکو د اوبو رسولو بهیر به بیرته منظم شي.

د دې شرکت مشر وايي، چې د ناحیې اوسېدونکو ته یې ۶ میاشتې اوبه ورکړي دي او له دې درکه یې له لسو میلیونو افغاینو زیاتې پیسې د شرکت پوروړلي دي.

دوی وايي، چې که د سیمې خلک د شرکت پیسې ورکړي ډېر ژر به یې د اوبو چارې تنظیم شي.