په فراه ولایت کې د امنیتي ځواکونو د مرګژوبلې له زیاتېدو وروسته ولایتي شورا نن ورځ (شنبه) په خبري غونډه کې د طالبانو لاس ته د فراه مرکز لوېدو په اړه خبرداری ورکړ.
د ولایتي شورا غړیو د ځايي چارواکیو مدیریتي کمزورتیا، د مرکزي حکومت نه پاملرنه، د تشکیل او پوځي تجهیزاتو کموالی او د ګاونډیو هېوادو د استخباراتو نفوذ د ناامنیو په تېره د امنیتي ځواکونو درنې مرګژوبلې لاملونه په ګوته کړل.
د فراه ولایتي شورا غړی داد الله قانع وایي، د فراه ۵۱۷ لویه لار په بشپړه توګه د طالبانو په لاس کې او سره له دې چې هغوی هره شپه یوه پوسته نیسي خو حکومت هېڅ اقدام نهکوي.
د ولایتي شورا د دغه غړي په وینا تېره شپه طالبانو د بالابلوک ولسوالۍ په دیزک سیمه کې د ملي اردو ۱۷ سرتېري وژلي دي.
د فراه ولایتي شورا یوبل غړی خیرمحمد نورزی وایي له هغه وخته چې نوی والی راغلی درې ولسوالۍ طالبانو نیولي او د امنیتي ځواکونو ټول تجهیزات د طالبانو لاس ته لوېدلي دي.
د فراه د والي ویاند ناصر مهري د ځايي چارواکیو نا پامي نه مني، خو وایي د امنیتي ځواکونو تشکیل کموالي له امله د امنیتي ځواکونو مرګژوبله زیاته شوې ده.
ولایتي شورا له هغه وروسته په فراه ولایت کې د ناامنیو په اړه نیوکه کوي چې له درې ورځو راهیسې نږدې ۳۰ امنیتي کسان د طالبانو ډلهییزو بریدونو کې وژل شوي او یوشمېر نور ټپیان شوي دي.
