کابل ښاروالۍ وايي، د دوی د پلان له مخې روان لمریز کال کې د ۱۲۷،۵ میلیونه ډالرو په لګښت پلازمېنه کې ۲۰۰ کیلومټره سړک پوخ او ورغول شي.
د کابل ښاروالۍ د نشراتو رییس عبدالجلیل سلطاني سلام وطندار ته وویل، ټاکل شوې د ۲۰۰ کیلومټره سړک کار تر راتلونکو دوو میاشتو پیل شي.
د سلطاني پرونیا د دې سړکونو په جوړلو سره به د کابل ښاریانو ډېرې ستونزې حل شي.
دی وايي، لګښت یې د نړیوالو همکارانو د کابل ښاروالۍ له امکاناتو برابر شوی دی.
د ښاروالۍ د نشراتو رییس ډاډ ورکړ، چې د سړکونو د جوړولو او رغولو له کاره جدي نظارت کېږي او په نړیوالو معیارونو برابر به جوړ شي.
د کابل ښاروالۍ چارواکي وايي، دوی د کابل ښار د ستونزو حل کولو لهپاره په یوولس کلن پلان کار کړی؛ دغه پلان به په لنډمهال، منځمهال او اوږدمهاله دورو کې عملي شي.
