په شمال کې د کرنې، اوبو لګولو او مالدارۍ وزارت د مالدارۍ او باغدارۍ ملي پروژې یا NHLP مسوول فهیم جباري په بلخ ولایت کې د کبانو روزنې د ۱۰ فارمونو جوړولو خبر ورکوي.
د جباري په وینا، یاد فارمونه د ګرمو اوبو او کارب کبانو دي چې هر یو یې په میاشت کې له ۷ تر ۸ ټنو کبانو روزنې وړتیا لري.
په همدې حال کې د کبانو فارم لرونکي ګلابالدین او لعلمحمد په بلخ کې د یادې پروژې د ستاینې ترڅنګ وايي، مخکې یې نوره ترکاري کرله چې لازمه ګټه یې نه ورته کوله، خو اوس یې په یو جریب ځمکه کې د کبانو روزلو فارم جوړ کړی چې ۶ زره کبان لري او په کال کې ۵ ټنه کبان تولیدوي چې پهدې سره یې کلنی عاید هم له ۷ تر ۸ لکو افغانیو کېږي.
بلهخوا د بلخ د کرنې ریاست مسوولان وايي، په یاد ولایت کې اوس د کبانو روزلو ۱۸ فارمونه فعال دي او تر راتلونکیو پنځو کلونو پورې به په دې برخه کې د بلخ ولایت اړتیاوې پوره کړي.
د بلخ د کرنې، اوبو لګولو او مالدارۍ ریاست سرپرست ذبېحالله زوبین وايي، که څه هم اوس په ۱۸ حوضونو کې ۶۰ زره کبان لري چې خرڅلاو ته چمتو دي، خو د بازار اړتیا ډېره ده او په راتلونکې کې به د چرګانو ترڅنګ، د کبانو په برخه کې هم پر ځان بسیا شو.
د کرنې، اوبو لګولو او مالدارۍ وزارت د مالوماتو له مخې، افغانستان په کال کې د ۳۰ میلیونو ډالرو په ارزښت د کبانو واردات لري.
