د افغانستان ښځینه فوټبال ملي لوبډله د تیاریو سره سره د مرکزي اسیا په لومړي پړاو ښځینه فوټبال ټورنامنټ سیالیو کې له ګډون کولو بې برخې شول.
د فوټبال فدراسیون د رسنیو څانګې مسوول علي کاظمي سلام وطندار ته وویل، چې افغان ښځینه فوټبال ملي لوبډله د ازبکستان هېواد، د ویزو نه ورکولو ستونزې له امله په دغو سیالیو کې ګډون ونه شي کړی.
نوموړي، د وېزې نه ورکولو لامله په ډاګه نه کړه.
د کاظمي په وینا، د ازبکستان سفارت د افغانستان ښځینه فوټبال ملي لوبډلې ته د دې هېواد ویزې ورنه کړې او لوبډله له سیالیو پاتې شوه.
د ازبکستان په کوربتوب د مرکزي اسیا ښځینه فوټبال سیالۍ افغان ښځینه فوټبال ملي لوبډلې له پاره ډیرې مهمی سیالۍ وي، چې په دې سیالیو کې له پیاوړو لوبډلو سره د لوبېدو موکه لرله.
یادې سیالۍ پرون د ازبکستان په پلازمېنه تاشکند کې پیل شوې چې افغانستان له تاجکستان او ترکمنستان لوبډلو سره په ګروپ کې وو.
د ورکړل شویو معلوماتو له مخې، د افغانستان ترڅنګ د ترکمنستان ښځینه فوټبال ملي لوبډله هم د نااعلان شوي دلیل له کبله په دې ټورنامنټ کی برخه نه لري.
روانه اونۍ د افغانستان فوټبال فدراسیون دغو سیالیو ته د پوره تیاریو او تمریناتو وروسته خپله لوبډله هم اعلان کړه.
ټاکل شوې وه، د افغانستان ښځینه فوټبال ملي لوبډله د لومړي ځل له پاره د مرکزي اسیا له پیاوړو ښځینه فوټبال لوبډلو سره لوبېدلې وي، چی د افغانستان فوتبال فدراسیون د سویلي اسیا زون په ځای په مرکزي اسیا زون کی د لوبېدو پرېکړه وکړه؛ خو د لومړي ټورنامنټ پیل یې ښه نه وو.
