.jpg)
ټاکل شوې ده، افغانستان سبا د فوټبال په یوې مهمې نړیوالې سیالۍ کې د سنګاپور فوټبال ملي لوبډلې پر خلاف د لوبې ډګر ته راووځي.
سیالۍ به سبا د (مارچ پر ۲۹مه نېټه) مازیګر ۳ بجې په افغانستان کې د امنیتي ستونزو له کبله د افغانستان په کوربتوب، خو د ګاونډي هېواد ایران په پلازمېنه تهران (تختي) فوټبال نړیوال لوبغالي کې وشي.
دیادونې وړ ده چې د دواړو افغانستان او سنګاپور فوټبال ملي لوبډلو ترمنځ دسبا ورځې سیالۍ د روسیې په کوربتوب ۲۰۱۸ کال فوټبال نړیوال جام او دغه راز د عربي اماراتو په کوربتوب ۲۰۱۹ کال اسیایي فوټبال جام سیالیو ته ټاکنیز پړاو د (راتګ) لوبه ده.
د افغانستان فوټبال فدراسیون وایي، چې د سنګاپور پر خلاف به د دې سیالۍ په بریا سره افغانستان د فوټبال په تاریخ کی د لومړي ځل لپاره د اسیا فوټبال جام سترو سیالیو ته لاره پیدا کړي.
.jpg)
د دواړو لوبډلو ترمنځ د (تګ) پړاو لوبه په سنګاپور هېواد کې شوې وه، چې له ښې لوبې وروسته ۱ د صفر ګول پر وړاندې کوربه لوبډلې ګټلې وه.
د افغانستان فوټبال فدراسیون وایي، چی ملي لوبډله له جاپان څخه څو ورځې وړاندې ایران ته رسېدلې ده او د سبا ورځې سیالۍ له پاره پوره چمتووالی لري.
په همدې حال کې د افغانستان فوټبال ملي لوبډلې کپتان فیصل شایسته په ایران کی رسنیو سره په خبرو کی ویلي دي، چې ایران ته د سنګاپور لوبډلې د ماتې له پاره ورغلي دي.
د افغان کپتان پر وینا، ایران کې ورته د افغان فوټبال مینه والو ډېره مینه او روحیه ورکړې او هڅه به وکړي، د خپلو مینه والو د مینې او تشویق په پایله کې افغانستان د اسیایي لوبې بل پړاو ته ورسوي.
د یادونې وړ ده، چې اوسمهال د افغانستان فوټبال ملي لوبډلې کپتاني فیصل شایسته ته او روزنه الماني «پیټرسرګیټ» په غاړه ده.
افغانستان خپله وروستۍ نړیواله فوټبال لوبه د تېرې پنجشنبې پر ورځ په جاپان کې له جاپان سره کړې، چې صفر – ۵ یې جاپان ته وبایلله.
