هر ییل 29- حوت شوروی کوچلری مقابلی‌ده مجاهدلر پیروز بولگن کونی هرات‌ده نشانلنه‌دی.
سابق جهاد رهبرلریدن اسماعیل خانگه طرافدار اونلب کیشی بو کوننی نشانلش بهانه‌سی بیلن موترسایکل، موتر و آتگه مینیب یوللرگه چیققنلر. کیچه ایسه هواگه قره‌ته اوق اوزیش و فشنگ اوریش بیلن بو کوننی نشانله‌گن خیابان چیققنلر.
هرات آسمانی‌گه قره‌تگه فشنگلر آتیش بیلن بیرگه هرات نینگ ایریم منطقه‌لریدن هواگه قره‌ته اوق اوزیش هم باشلنگن. هرات حوزه‌وی شفاخانه‌سی نینگ مسووللری، اوشبو اوق اوزیش نتیجه‌سیده بیر عیال و بیر گودک شامل یره‌لنگن بیش کیشی شفاخانه‌گه آلیب کیلینگن دیدی.
تحلیلچیلر همده مدنی فعاللر، اوزباشیمچه هواگه قره‌ته اوق اوزیش هنوز هم کیشیلرنینگ آلدیده ناقانونی قورال – اسلحه حددن کوپ بولگن لیگیدن کیلیب چیقه‌دی دیدیلر. اولر، بو خصوصده امنیتی اداره‌لرنینگ بی فرقلیککه عیبله‌گنلر.
سیاسی تحلیلچی محمد رفیق شهیر، کیچه هواگه قره‌ته اوق اوزگنلر تیزلیک بیلن قولگه آلینیشی ضرور دیگن. باشقه بیر تحلیلچی عبدالقادر کامل، اوز باشیمچه اوق اوزیش توغریسیده محلی اداره همده پولیس نینگ جیم توریشی قانون‌دن باش تارتیش فرهنگینی ترغیب قیلیش معنیسی‌ده دیگن.
هراتلیک مدنی فعال شفیق بهروزیان، ولایت خلقی نینگ کته قسمی قوراللنگن دیدی. اینگ کیچیک بهانه بیلن قوراللرینی ایشگه سالیش‌گه اولگوره دیلر. اونینگ ایتیشیچه، اوتگن کیچه هرات نینگ بوتون شهریدن هواگه قره‌ته اوزباشیمچه اوق اوزیلگن.
شونینگدیک هرات شهری‌نینگ یشاووچیلری، ناقانونی قوراللی شخصلردن تشقری امنینی کوچلرهم حوزه‌لر ایچیدن توریب هواگه اوق اوزگن لیکلرینی ایته‌دیلر.
هرات پولیس قوماندانلیگی نینگ سوزلاووچیسی عبدالاحد ولیزاده، اوتگن کیچه اوز باشیمچه هواگه اوق اوزیشنی تیکشیریش اوچون کمیسیون تشکیل بولگن لیگینی ایته‌د‌ی. او، هواگه اوق اوزیش نینگ عامللری قولگه آلینیشی توغریسیده تاکید ایتگن.
