سلاموطندارگه ییتیشگن حجتلرگه کوره، سرپل ولایتیدن بولگن نمایندهلر کینگشی سیلاوینینگ نامزدی اسدالله ایوبینینگ آتهسی و ناقانونی قوراللی کیشیلردن بیری حاجی رحیم، مذکور ولایتده نیچه آواز بیریش مرکزده زوروانلیگی، عسکرلری و قولیدهگی قوراللردن فایدهلنیب سیلاو صندوقلرینی اوغلینینگ نفعی گه تولدیرگن و عین حالده، اهالینی اوغلی گه آواز بیریش اوچون زورهلگن.
اوشبو قضیه توغریسیده، 1397-8-29 تأریخیده سرپل ولایتیده سیلاولر شکایتلرینی تینگلش کمیسیونی تامانیدن صادر ایتیلگن کیلیشوونامهده کیلیشیچه، اوشبو کمیسیون سرپل ولایتینینگ تُکزار ایکینچی قیزلر لیسهسی، تُکزار ایسکی شهر اورته اوقولی، خواجه سرخ و شبوکند مسجدیده بولگن آواز بیریش مرکزلرده ناقانونی قوراللی کیشی حاجی رحیم، سرپل ولایتیده نمایندهلر کینگشی سیلاوینینگ نامزدی بولگن اوغلی داکتر اسدالله ایوبینینگ نفعی گه قیلگن سیلاو جنایتی گه تیگیشلی حجتلر و گواه نامهلرنی تیکشیرگنیدن سونگ، سیلاو سِری و ایرکینلیگینی سوراققه دوچ قیلگنی بیلگیلنگن و شو یوزهدن مذکور کمیسیون، نافذه قانونلری اساسیده، ایسلنگن مرکزلرده اسدالله ایوبینینگ آوازلرینی بیکار قیلگن.
شونینگدیک، 1-9-1397 تأریخیده سرپل ولایتیده سیلاولر شکایتلرینی تینگلش کمیسیونینینگ مصوبهسیده کیلیشیچه، توپخانه آواز بیریش مرکزیدن کیلگن شکایتلر و گواهنامهلر اساسیده، مذکور مرکزنینگ آوازی 11-8-1397 تأریخیده اوتکزیلگن ییغینده تیکشیریلگنیدن سونگ، کمیسیون کیلیشووی اساسیده قارهلنگن و 30-8- 1397 تأریخیده اوتکزیلگن تیکشیروودن کیین توپخانه آواز بیریش مرکزیده فایدهلنیلگن آوازلر، آواز بیرووچیلرنینگ رویخطیدن آرتیقلیگی بیلگیلنگن. کمیسیوننینگ توپلم کیلیشووی، سیلاو قاعدهسی و قانون اساسیده، مذکور مرکزنی آوازلری بیکار قیلینهدی.
بیراق، محلی بیر منبع نینگ ایتیشیچه، کابلده سیلاولر ایرکین کیمسیونی، اوشبو مرکزلرنینگ برچه آوازینی سرپل ولایتینینگ سیلاولر شکایتلرینی تینگلش کمیسیونینینگ قرارینی نظرگه آلمهی قیتهدن سنهگن.
باشقه بیر حجت گه کوره، سرپل ولایتینینگ سیلاولر شکایتلرینی تینگلش کمیسیونی، سیلاولر شکایتلرینی تینگلش کمیسیونینینگ مرکزی دفتری، سرپل ولایت مقامی و خوفسیزلیک قومندانلیگی آتلریگه یازگن نامهسیده کیلیشیچه، سهشنبه کون 1-8-1397 تأریخیده، سرپل ولایتیده نمایندهلر کینگشی سیلاوینینگ نامزدی اسدالله ایوبی و آتهسی حاجی رحیم، قطار کیشیلری بیلن بیرگه سرپل ولایتینینگ سیلاولر شکایتلرینی تینگلش کمیسیونی گه کیلیب و مذکور کمیسیون باشلیغی نقیبالله تاتارنی تهدید قیلگنلر.
اوشبو نامهنی باشقه بیر بولیمیده اسدالله ایوبینینگ آتهسی حاجی رحیم دن نقل قول قیلینگن و بو نقل قولده بوندهی دییلگن: «مین و اوغلیمدن شکایت قیلماقچی بولسهلرینگ مرکزگچه قوللرینگ ایرکین دیر؛ هیچ بیر ایش قیله آلمهیسیزلر.»
سرپل ولایتیدن بولگن مردمی کوچلر قومندانی حاجی رحیمنینگ 100-200 ناقانونی قوراللی آدمی بار. بیراق حاجی رحیمنینگ ادعا قیلیشیچه، بوندن آلدین ایچکی ایشلر و مدافعه وزیرلیگی چارچوبهسیده فعالیت قیلگن و حاضرده خوفسیزلیگینی تامینلش اوچون پولیس کوچلریدن بیر قطاری حکومت تامانیدن وظیفهلنتیریلگن.
حاجی رحیم برچه عیبلاولرنی رد قیلیب ایتیشیچه، کیمسهنی اوغلیگه آواز بیریش اوچون زورلمهگن. او، بو موضوعنی یقیندن حل قیلیش اوچون مملکت باشکینت کیلگن.
نمایندهلر کینگشی سیلاویدن سلاموطندارگه ییتیشگن قطار ویدیو و یوزلیک، حاجی رحیمگه تیگیشلی بولگن قطار ناقانونی قورالی کیشیلرنینگ آواز بیریش محلده حضور تاپگنینی کورستهدی. شونینگدیک، سیلاودن نیچه کون آلدین ثبت ایتیلگن باشقه بیر ویدیوگه کوره، اسدالله ایوبیگه تیگیشلی بولگن قطار موتر و موتر سایکلگه مینیلگن قوراللی کیشیلر بیر نمایش آرقهلی سانچارک تومنینینگ مرکزی تامان کیتگنلر.
سیلاولر شکایتلرینی تینگلش کمیسیونی سوزلاوچیسی و کمیشنری علیرضا روحانینینگ نمایندهلر کینگشی سیلاوینینگ نامزدی اسدالله ایوبیگه قرشی بولگن ادعالر و حاجی رحیمگه تیگیشلی بولگن قوراللی کیشیلر سیلاو لایحهسیگه دخالت قیلگنی خصوصیده ایتیشیچه، بو موضوعلر توغریسیده سیلاولر شکایتلرینی تینگلش کمیسیونینینگ ولایتی دفتری مسووللری تامانیدن آلینگن قرار قانونی دیر؛ بیراق «سیلاولر ایرکین کمیسیونی بو قرارلرنی تَن آلمهیدی.»
عینحالده، سرپلده سیلاولر شکایتلرینی تینگلش کمیسیونینینگ مسووللری، داکتر اسدالله ایوبینینگ آوازلریدن بیر قطارینی بیکار قیلیب و مذکور کمیسیوننینگ ایشلاوچیلری تهدید ایتیلگنی خصوصیده، حکومتی ادارهلر و سیلاولر شکایتلرینی تینگلش کمیسیونینینگ مرکزی دفتریگه بیر شکایتنامه یوبارگن، بیراق حاضرگهقدر جناب ایوبی 7 مینگدن آرتیق آواز بیلن سرپل ولایتیده ایلغار نامزدلردن بیری دیر.
