د روسيې ولسمشر ولاديمير پوتين وايي، دوی ته دا د خوشالۍ خبره ده چې د افغانستان واګې او قدرت یو تجربه کاره شخص ته رسېدلی.
نوموړي، چې د روسيې په اوفای ښار کې د شانګهای په ۱۵ مه غونډې کې د افغان ولسمشر محمد اشرف غني سره خبرې کولې دا هم وویل، چې ولسمشر غني د بن کنفرانس راهیسې پېژني او نوموړی د بن کنفرانس د بيانيې په برابرولو کې اړين رول لوبولی دی.
پوتين زیاته کړه، چې روسیه به د افغانستان د امنيتي وضعيت په عادي کولو کې خورا اړين رول ولوبوي.
افغان ولسمشر د دغې کتنې په څنډه کې وویل، چې د افغانستان اوسنی اقتصادي وضعیت لکه د روسيې د څو کلونو وړاندې په شان د کړکېچ سره مخ دی او هيله يې وښوده، چې د پوتين په شان به دی هم افغانستان له دغو اقتصادي کړکېچونو وباسي.
نوموړي روسیه د افغانستان یو ستراتيژيک او مهم ګاونډ یاد کړ او زياته يې کړه، د يوې سيمه ييزې اجماع په وسیله به په افغانستان کې د سولې هلې ځلې واقعي او دغه هېواد امن کړو.
همدارنګه تېره ورځ پوتين اعلان وکړ، چې د افغانستان له پاره به د روسيې هېواد له خوا بار وړونکي موټرې په وړیا توګه ورکړل شي.
له دې وړاندې بیجينګ هم د افغانستان څخه خپل ملاتړ اعلان کړ او ژمنه يې وکړه، چې د افغانستان د هوايي ځواکونو د پياوړي کولو له پاره به لازمې مرستې وکړي.
