د افغانستان د ازادو رسنیو ملاتړ ادارې یا نی مسوولانو نن په کابل کې د خبري غونډې پرمهال د دې بنسټ کلنی راپور خپور کړ.
د نی کلني راپور پر بنسټ، د ۱۳۹۵ کال په پرتله په ۱۳۹۶ کال کې له خبریالانو سره د تاوتریخوالي بېلابېلو پیښو کې ۵۱ سلنه زیاتوالی راغلی دی.
د نی اجرایوي مشر عبدالمجیب خلوتګر غونډی ته وویل چې له خبریالانو سره د تاوتریخوالي ۱۶۶ بېلابېلې پېښې ثبت شوي چې ۱۹ يې د وژنې، ۴۱ يې د تپي کېدلو، ۲۳ يې د وهلو او ټکولو او ۶۷ نورې یې د ګواښ او سپکاوي پېښې دي.
ښاغلي خلوتګر د خبریالانو وضعیت خراب وبللو او زیاته يې کړه چې د ۱۳۹۵ کال په پرتله په ۱۳۹۶ کال کې د خبریالانو د وژنې پیښې ۲۶ سلنه زیاتې شوي؛ خو د ټپي کېدلو په برخه کې بیا ۴۳ سلنه کموالی راغلی.
ښاغلي خلوتګر په ورته وخت کې هغه خپاره شوي راپورونه رد کړل چې د هېواد په ۱۰ ولایتونو کې رسنۍ ښځینه کارکوونکې نهلري.
د نی اجرایوي مشر وايي چې د دوی د سروې پر بنسټ، په ټوله کې د هېواد په رسنیو کې د ښځینهوو حضور زیات شوی او زیاتوي چې په ۵ ولایتونو نورستان، پکتیا، روزګان، زابل او غور کې رسنۍ ښځینه کارکوونکې نهلري، د ۱۱ ولایتونو په رسنیو کې د مېرمنو حضور ثابت دی؛ خو په ۷ ولایتونو کې کم شویدی.
د نی مسوولانو له حکومته وغوښتل چې له خبریالانو سره د تاوتریخوالي مخنیوي مسلې ته دې جدي پام وکړي.
